Item ad hoc ut Magistri melius veniant ad examinationes publicas vel privatas, et ut scolares in eisdem examinationibus publicis, vel privatis, melius honorentur, statuimus et ordinamus quod quilibet magistrorum nostri colegij, qui de cetero aliquem suum scolarem voluerit promovere, teneatur et debeat facere satisfieri cuilibet magistrorum nostri collegij, qui presens fuerit, pro examinatione privata soldos xij. bon. et pro publica xviij. soldos bon. in medicina. In artibus vero servetur modus consuetus in virtute prestiti iuramenti, et pena privationis colegij videlicet illi qui presentaverit, vel examinari fecerit scolarem suum cuiuscunque fuerit facultatis, et non possit restitui, nisi prius solverit de propria sua pecunia salarium superius ordinatum et tantumdem colegio magistrorum, masario consignanda.