Item quod quicunque magistrorum nostri colegij deinceps voluerit aliquem scolarem promovere ad magisterij dignitatem, non possit nec debeat, nisi primo scolaris audiverit [487] in quacunque facultate, in qua voluerit promoveri, ad minus v. annis, et substinuerit in scolis publicis tre questiones aut duas, et unum quo[d]libet, et legerit extraordinarie aliquem librum, seu tractatum, in arte sua. Et si fuerit scolaris in medicina et fuerit in primitivis scientijs magistratus, studuisse debeat tribus annis ad minus in ipsa scientia medicine, et quod quilibet magistrorum scolarem promovendum primo representet priori, et tunc prior, facta prius diligenti investigatione de scientia ipsius, vita, moribus, et honestate persone, data licentia magistro suo, per priorem presentetur domino Archidiacono, vel eius vicario. Et si aliquis magistrorum contra predicta vel aliquod predictorum fecerit, condampnetur arbitrio prioris et consiliariorum, vel maioris partis ipsorum, et a nostro colegio sit penitus exclusus, et non possit restituj, nisi de voluntate totius ac maioris partis colegij, scrutinio celebrato cum fabis albis et nigris, facta prius satisfattione condigna, reservato semper arbitrio prioris in tempore supradicto studendi et modo et forma superius data, facta per ipsos diligenti investigatione, ut eis videbitur expedire, quia quandoque ingenium, vita, mores et honestas persone suplet defectum temporis superius pretassati et aliorum, que superius dicta sunt, de modo et forma studendi et substinendi questiones et legendi librum vel tractatum.