Statuimus quod nullus scolaris promovendus in scientia medicine possit promoveri sub aliquo doctore nostri collegij, si obmiserit doctorem suum quem ultimo audivit de mane sex mensibus ultimjs, doctore suo inrequisito et volente ipsum promovere; et quod nullus alius doctor ipsum nostro collegio presentare audeat, sub pena cuilibet contrafacientj decem librarum bon. Et nullus doctor nostri collegij audeat interesse dicto examinj, sub pena decem librarum bon. cuilibet contrafacientj applicanda, et dividenda, ut supra. Adhicientes etiam quod si contingat aliquem scolarem forensem vel civem promovendum non habere doctorem suum ordinarium, quem ultimo audiverit de mane Bononie, quando voluerit presentarj teneatur predictus scolaris accipere in eius examine, unum ex doctoribus tunc Bononie de mandato legentibus, aliter non acceptetur ad examen per priorem, sub pena priorj X. librarum bon., nec talis promotio valeat et valere intel[l]igatur. Et quod nullus doctor adesse debeat tali promoctioni, sub pena cuilibet contrafacientj et qualibet vice librarum quinque bon., exigenda ut supra et dispensanda.