Insuper misericorditer compensantes cum sint quandoque in nostro studio aliqui pauperes suficientes in nostra scientia et propter paupertatem non valeant promoveri, ne eorum scientia, inremunerata permaneat, statuimus et ordinamus quod omnj anno duo scolares pauperes, unus in physica et alter in cirusia, possint et debeant examinari private et publice in physica et cirusia private et poni in matricula perfectorum cirusicorum, secundum constitutiones de hoc loquentes, nullo salario a scolaribus supradictis per doctores dicti collegij et eorum notario et Bidello percepto. Et quod quilibet doctor debeat interesse tali vel talibus promotionibus vel examinationibus privatis, vel publicis, sub pena quinque librarum bon. pro qualibet vice et cuilibet contrafacienti exigenda, et dispensanda et applicanda collegio antedicto nisi legiptimam dederit causam, approbatam per dictum dominum priorem et collegium. Que paupertas probetur et proprobari debeat coram domino priore et duabus partibus collegij; quibus omnibus probatio talis juridice constet. Et si unquam [acciderit] quod talis vel tales scolares juraverint falsum, incidant in penam periurij, nec tales intelligantur licentiati nec conventuati, nisi aliter fuerit dispensatum per doctores collegij quod ipsi teneantur dare collegio nostro salarium consuetum. Et similiter doctori suo vel doctoribus, sub quo, vel sub quibus, promoti sunt.