Item statuerunt et ordinaverunt quod bidelli generales teneantur et debeant omnes et singulas privationes et precepta privationum et quecumque alia eis seu alteri eorum imposita, legere, publicare et facere, secundum mandatum domini Rectoris; et ipsis sic publicatis et factis, ea die vel sequentj debeant referre, presentare et designare notario Universitatis, ad hoc ut de ipsis semper copia habeatur, pena cuilibet eorum pro qualibet vice quadraginta solidorum bon., et pena notario, si non posuerit omnia precepta, privationes et citationes in libris ad hoc deputatis, duorum solidorum bon. pro qualibet vice, exigenda per Rectorem infra octo dies, sub eadem pena. Et quod omnes privati et res private scribantur in quadam tabula, que publice stet in statione generalj, ut omnibus pateat evidenter per unum ex bidellis generalibus Universitatis, sub pena viginti solidorum cuilibet eorum, et pro qualibet vice, qua predicta vel predictorum aliquid obmiserint scribere.