Item statuerunt et firmaverunt quod bidelli generales Universitatis habeant et habere debeant et tenere continuo in statione infrascriptas petias de bona littera et bene correctas, videlicet Galieni de simplici medicina, de alimentis, de febribus ad Glauchonem, de virtutibus naturalibus, de accidenti morbo, de malicia complexionis diverse, de iuvamentis membrorum, de interioribus, de crisi, de creticis, de flobothomia, de tabe, de secretis Galieni, de motibus, [de] liquidis, de pulsibus omnes, de ingenio sanitatis a principio usque ad quartumdecimum, de complexionibus, de differentijs febrium, de elementis primi, secundi, tertij, quarti, et quinti Avicenne, Sarapionis de simplicibus, coliget et guilielmine; et dictas petias continuo tenere in statione et de eis petentibus copiam facere. Habeant insuper et habere debeant dicti bidelli quandam cartam, sive tabulam, in qua scripte sint omnes et singule petie quas habebunt, et tituli questionum disputatarum; que quidem stent publice et patenter appensa in statione predicta, ita quod quilibet possit legere et videre. Et quod non possint denegare alicuj petenti aliquam petiam si habuerint eam in statione, habendo pignus ab eo qui eam petierit, sub pena quinque solidorum pro qualibet vice. Statuerunt insuper et firmaverunt quod dicti bidelli, et quilibet eorum, debeant pacifice et benivole recipere et acceptare scolares Universitatis, et nullo modo dicere eis aut alicuj eorum verba iniuriosa vel vituperosa, aut insultum in aliquem vel contra aliquem scolarem facere. Et si contrafecerint, dominus Rector presens, et qui pro tempore fuerit, una cum consciliarijs habeat [285] purum, merum, generale et absolutum arbitrium inquirendi, procedendi, puniendi et condempnandi suo arbitrio, secundum qualitatem facti. Penas autem ut supra impositas per dictum dominum Rectorem et Consciliarios ipse Rector effectualiter exigere procuret et teneatur, sub penis in statutis contentis. Que omnia et singula e converso intelligantur in scolarem dicentem iniuriam dictis bidellis aut facientem insultum in eos, vel contra eos vel alterum eorum. Item quod quilibet bidellus seu stationarius teneatur et debeat petias suas, quas scolaribus locat, habere et tenere ordinatas, luminatas et bene correctas, pena unius solidi pro qualibet petia et qualibet vice.