Statuimus et ordinamus quod quilibet scolaris qui deinceps voluerit recedere, teneatur per tres dies ante recessum suum facere per alterum ex bidellis generalibus Universitatis dici et proclamarj per scolas, quod notum sit omnibus quod talis de tali loco (nominando nomen ipsius quj vult recedere et unde est et cuius doctoris est scolaris) intendit recedere a civitate Bononie; unde si aliquis vult aliquod petere ab eo infra tertiam diem debeat comparere coram domino Rectore, alias habebit licentiam recedendi. Et si predicta facere noluerit, debeat saltim ydoneum substitutum et procuratorem loco suj relinquere, qui faciat predicta per scolas proclamarj et qui respondeat cuilibet de jure et satisfaciat. Et si non comparuerit aliquis infra dictum terminum, transacto dicto termino, possit quandocunque recedere, quandocumque voluerit, obtenta licentia domini Rectoris. Et si aliquis scolaris recesserit non observando predicta, teneatur Rector, ad petitionem asserentis se creditorem, si eum creditorem, etiam summatim, eidem domino Rectori constiterit, dictum scolarem privare, a qua privatione restituj non possit, nisi fuerit in concordia cum dicto creditore et solverit nomine pene Universitati centum solidos [bon]. Item ad evitandam omnem calumpniam que in futurum posset committj, statuerunt quod, factis proclamationibus predictis per scolas per dictos bidellos, quod dicti bidelli eodem die quo proclamaverint debeant renuntiare notario Universitatis dictas cridas, nominando et dicendo sibi nomen dicti talis facientis proclamare per scolas aut de quo facte fuerunt dicte cride. Quj faciens proclamare debeat esse una cum dictis bidellis. Quj notarius predicta scribere teneatur, ut retulerunt sibi dicti bidelli, in quodam quaterno ad hoc deputato, et habeat et habere debeat pro dictis cridis solidum unum bon., pena ipsi bidello qui dictas proclamationes fecerit per scolas, si ipsas eidem notario non retulerit, pro qualibet vice quinque solidorum bon., et dicto facienti proclamare, seu ad cuius petitionem facte fuerunt proclamationes, quinque solidorum bon., et perinde esset ac si non fecisset proclamari per scolas, cui scripture plena fides adhibeatur. Item cum contingat scolares volentes recedere velle buletas librorum, statuerunt quod nullus domicellus Rectoris vel alia persona, audeat vel presumat aliquid recipere de aliqua buleta bulanda, vel sigillo universitatis ponendo super aliqua littera, pena cuilibet, qui aliquid receperit, pro qualibet vice viginti solidorum bon. et cuilibet Rectori, qui aliquid permiserit recipiendum, quadraginta solidorum bon.