Item statuerunt quod aliquis scolaris cuiuscunque facultatis, aut quivis alius ut scolaris se gerens, non possit nec valeat gaudere benefitio aliquo seu commodo Universitatis predicte seu statutis ipsius, aut per ipsam Universitatem, Rectorem ipsius aut statuta dicte Universitati defendj, nisi sit scolaris juratus qui iuraverit servare statuta Universitatis et obedire Rectori in licitis et honestis ut supra. Decernentes insuper quod aliquis doctor [274] seu professor alicujus alterius scientie quam medicine vel artium, non possit pro aliquo vel contra aliquem procurare vel advocare aut sollicitare palam vel secrete, nisi iuratus fuerit servare statuta et obedire Rectorj, ut supra, salvo quam in causa seu causis, litibus seu questionibus suis vel suorum licite esse, advocare et procurare possit, pena cuilibet advocanti, procurantj, sollicitanti, et pro qualibet vice, quadraginta solidorum bon. et cuilibet cuius advocatus esset, procurator aut sollicitator, quadraginta solidorum et pro qualibet vice. Quam penam solvere teneatur quilibet contrafaciens infra tertiam diem postquam dictam penam incurrerit, sub pena privationis; a qua privatione restituj non possit nisi dicta pena soluta, et quilibet possit accusare et denuntiare et habeat medietatem condempnationis. Et Rector quilibet, qui pro tempore fuerit, possit et teneatur procedere ad petitionem cuiuscumque et delinquentem condempnare, sub pena centum solidorum bon. eidem Rectori, eidem per sindicos auferenda in fine suj offitij.