Ad utilitatem scolarium bononie studere volentium statuerunt et ordinaverunt quod singulis annis studium debeat inchoari inmediate post festum sancti luce, adeo quod super prolongatione principij studij faciendi Rector et Consciliarij nullatenus habeant potestatem, nec super hoc ad petitionem alicuius doctoris vel alterius persone, possit modo aliquo dispensari etiam per Universitatem. Adicientes quod magistri et omnes alij legentes tam ordinarie quam extraordinarie unum festum solum in ebdomada faciant, nisi esset festum sollempne vel alia festa sollempnia fuerint, et non fuerint in die jovis; nec ad preces alicujus contrarium faciat, nisi iusta causa subesset. Item pro festivitate paschatis resurrectionis, festarj incipiat die dominico olivarum, et postea incipiatur die lune leji post octavam diem dominicam paschatis resurrectionis. Item quod unusquisque doctor, incipiendo festare pro festivitatibus nativitatis, teneatur legere usque ad vigiliam sancti thome, sub pena cuilibet contrafacientj, si fuerit scolaris, decem solidorum bon., et si fuerit doctor vel Rector quinque librarum bon., et hoc proiciendo paleas vel faciendo aliquem actum per quem impediatur doctorem legere. Item quod doctores non debeant legere ordinarie usque ad festum Circumcisionis, et immediate post dictum festum debeant legere ordinarie sub dicta pena. Et quod studium debeant complevisse seu terminasse in fine mensis augusti cuiuslibet annj; hoc addito quod in kalendis mensis Maij cuiuslibet annj festentur sex dies pro potionibus sumendis more solito.