Pro honore Rectoris scolarium universitatis et honore dicte universitatis medicorum, et reconpensatione expensarum eiusdem, statuimus et firmamus quod de cetero quicumque fuerit Rector dicte universitatis, qui dictum officium rectoratus per tempus et spatium octo mensium ad minus exercuerit, volens promoveri in scientia medicine in nullo teneatur sallario doctoribus collegij medicorum in eius privata et publica, non obstante statuto posito sub Rubrica quid et quantum debeant solvere scolares in privata et publica etc.; salvo quod pro expensis factis et fiendis in dicto collegio volumus ipsos teneri debere solvere ducatos duos aurj collegio medicorum, dispensandos inter doctores dicti collegij in privata dictorum rectorum, et in eorum publica solvere teneatur solum pro dignitatibus doctoribus collegij libras sex bon. Et hoc propter labores et tedia quos substinent doctores tempore quo dicta insignia prestantur, et propter perdictionem temporis et incomodum infirmorum, quos habent visitare dicti doctores. Et quod quilibet magister vel magistrj, sub quo vel quibus, tales rectores promoventur, qui fuerit, vel fuerint, vestitus, vel vestiti, et inducti de eodem panno, vel consimili, de quo, vel quibus, induti erunt Rectores in eorum publica, solvere debeant collegio medicorum occaxione predicta ducatos duos auri pro quolibet eorum. Jta tamen quod nullus illorum dicto salario participet; volumus tamen dictos rectores tenerj debere pro ipsorum honore ad exenia prioris et doctoris vel doctorum, sub quo, vel quibus, fuerit promotus, et ad soluctionem notarij et bidellj collegij medicine, secundum formam constitutionum de hoc loquentium. Adhicientes quod in casu, in quo rector universitatis medicine sit, vel fuerit, contra statuta, vel honores, collegij antedicti, vel doctorum dicti collegij, vel alicuius dictorum doctorum, non debeat gaudere privilegijs, vel privillegio rectoratus, et ipso facto ipso benefficio, privillegio, seu privillegijs, sit privatus.