Statuimus et ordinamus quod nullus scolaris examinatus in scientia medicine possit eadem die, qua examinatus fuerit, licentiam publicam habere in dicta scientia, nisi fuerit Rector universitatis, vel filius, frater, vel nepos alicuius doctoris nostri collegij. Et tum, et eo casu, ille talis teneatur satisdare, et facere depositum de centum ducatis aurj, eadem die qua examinatus fuerit, priori collegij, qui pro tempore fuerit. Et quod infra duos menses suas dignitates capiet in civitate bon., ita tamen quod nullus doctor nostri collegij possit pro ipso scolari licentiando fideiubere, ad penam vigintiquinque librarum bon. ipsi doctori fideiubenti; que pena debeat infra mensem per priorem exigi et inter doctores nostri collegij dividi. Ita tamen quod fideiussor, qui dictum depositum confitebitur se habere ad instantiam dicti prioris, sit merchator vel alia persona sufficiens, de cuius sufficientia constet nostro collegio et domino priori. Adhicientes quod quilibet scolaris promovendus, civis vel forensis, possit accipere doctorem vel doctores quos voluerit: dignitates autem recipere debeat et teneatur publice in catedra magistrali ecclesie bon. secundum ordinem consuetum.