[428] Statuimus et ordinamus quod prior dicti collegij eligatur ad brevia et ipsius ele[c]tio et creatio fiat et fieri debeat modo et ordine infrascripto, videlicet quod scribantur et scribi debeant omnia nomina doctorum incorporatorum de dicto collegio in cartis membranis et brevibus equalibus que publicari et poni debeant in una pisside, et tempore electionis fiende prior, qui pro tempore fuerit, teneatur et debeat congregarj facere doctores dicti collegij per quinque dies ante finem sui offitij, sub pena vigintiquinque librarum bon. et privationis offitij prioratus per spatium quinque annorum. In qua congregatione interesse debeant ad minus due partes doctorum dicti collegij, presentialiter existentes in civitate Bononie. Et ad electionem novj prioris procedere teneantur modo et forma infrascriptis, videlicet quod de dicta pisside extrahatur per dictum priorem vel per antiquiorem doctorem dicti collegij, secundum ordinem dicti collegij tunc existentem in dicta congregatione, unum de dictis brevibus prout sors dederit, et sic ille qui extractus fuerit sit et esse intelligatur prior dicti collegij pro tribus mensibus proxime futuris post finitum offitium eius pre[de]cessoris; demum ipsum breve sic extractum, remittatur et reponatur et salvetur in alia pisside; et postea ita succes[s]ive et subsequenter, tempore cuiuslibet electionis, extrahatur unum breve de dicta pisside in qua primitus fuerant omnes positi, et reponantur in alia donec omnia brevia erunt de ipsa pisside extracta modo predicto. Et ipsis omnibus sic extractis, iterum et de novo reponantur et mictantur in dicta prima pisside et extrahantur tempore dicte electionis et reponantur in alia modo et ordine predicto, donec erunt omnia extracta et sic successive. Cuius primj prioris sic creati et electi, modo predicto offitium incipere debeat finitis tribus mensibus prioris tunc suum officium finire debentis, et duret tribus mensibus, ut supra, et non ultra, et aliorum priorum, sic creandorum, incipere debeat finitis dictis tribus mensibus et duret ut supra. Qui prior sic electus, tempore dicte electionis, si presens fuerit, vel in proxima congregatione fienda de dicto collegio et doctoribus ipsius juret et jurare teneatur cum effectu se vere esse civem Bonon. natione propria et paterna, et etiam jurare teneatur et debeat corporaliter ad sancta dei evangelia, manu tactis scripturis, in manibus tunc prioris, collegium prelibatum eiusque jura totis viribus deffendere, et constitutiones eiusdem collegij observare iuxta ipsius possibilitatem, et non pati collegium predictum congregarj, nec etiam congregarj facere pro aliqua re vel facto quod videatur reddere posse seu reddondare in da[m]pnum, dedecus vel obprobrium dicti collegij. Et quemlibet doctorem dicti collegij venientem contra constitutiones ipsius collegij, vel aliquam earum verbo vel facto, condempnare secundum modum et formam dictarum constitutionum, et penas, in quibus incurrisset seu incurrissent vigore dictarum constitutionum, exigere seu exigi facere infra tempus eius prioratus offitij, sub pena dupli eius quod fuerit conde[m]pnatus ille a quo exigere debuerit. Item etiam quecumque eidem domino priori in segreto com[m]issa per dictum collegium, in secreto retinere et non propalare, nixi si et quando processerit de vol[u]ntate doctorum dicti collegij. Et etiam quod in dicto collegio non proponet nec proponj consentiet directe vel per obliquum quod aliqua constitutio vel eius pars tollatur vel dispensetur, nixi si et in quantum caveretur et permicteretur ex forma dictarum constitutionum vel alicuius earum, vel nixi processerit de voluntate trium partium ex quatuor partibus doctorum dicti collegij principaliter existentium in civitate Bon., scruptinio cum fabis albis et [429] nigris inter ipsos primo legiptime celebrato. Et quod congregabit et congregarj faciet predictum collegium tociens quotiens videbitur congruum et opportunum fore pro bono, honore, comodo et utilitate dicti collegij et doctorum eiusdem et non aliter nec alio modo nec alia causa, et etiam quotiens fuerit requisitus per tres doctores dicti collegij. Volumus etiam quod post electionem prioris eligantur duo consciliarij secundum formam predicte constitutionis de electione prioris.