Statuimus et ordinamus ad hoc ut doctores bononie physice facultatis habeant occaxionem in ipsa civitate manendi et cotidie in lecturis perseverandj, et ut ceterj doctores cives extra civitatem exeuntes diligencius et animoxius redeant, et ut in lecturis sit ordo bonorum doctorum, quod per priorem et doctores nostri colegij eligantur duo valentiores et famoxiores ex dictis doctoribus qui sint nativi bononie ratione originis proprie vel paterne, et qui sint doctorati in dicta civitate, ad sedes ordinarias de mane, salariatas per comune Bononie pro qualibet sede, librarum centum bon. Et quod nulus forensis doctor, cuiuscunque conditionis existat, audeat vel presumat legere de mane et ordinarie, vel extraordinarie easdem lectiones concurentes cum predictis electis in dicta scientia medicine, sub pena cuilibet contrafacienti centum librarum bon., exigenda per dominum Potestatem, vel eius Vicarium. Cuius medietas aplicetur comuni bononie, alia medietas nostro colegio.