Statuimus etiam quod nullus scolaris promovendus possit promoverj in s[c]ientia medicine nixi sub duobus doctoribus ad plus, propter illas evictare expensas, salvo quod si fuerit venerabilis persona qui voluerit plures habere doctores, quod tunc, et eo casu, teneatur dare vestes in eorum publica pro inducto, guarnachia, mantello et caputeo, s[c]ilicet XIIIJ. brachia optimj et bonj pan[n]j pretij saltim XL. solidorum bon. ad minus, omnibus illis doctoribus et singulis doctoribus eum promoventibus, et de hoc teneatur satisdare priori nostrj collegij in eius privato examine, aliter non admictatur. Et quod alias nullus doctor nostrj collegij possit dicte promotioni interesse neque debeat, sub pena decem librarum bon. pro singullo contrafacienti. Et quod prior collegij mandet omnibus et singulis doctoribus nostri collegij quatenus, sub pena predicta decem librarum bon., non debeant alicuj tali promoctioni, que fieret non servatis predictis, interesse, sub pena priorj non mandanti et predicta non observantj, XX. librarum bon., exigenda ut supra. Adhicientes quod quilibet scolaris promovendus in s[c]ientia medicine teneatur dare et solvere in eius publica doctori, sub quo promovetur, libras sex bon. Et si duos doctores acceperit, sex libras bon. pro unoquoque, et si plures doctores acceperit, fiat as[c]ensive ut supra. Adhicientes etiam, quod si promovendum contingat induere aliquem doctorem, teneatur et debeat jnduere illum de eodem panno de quo ipse est indutus in eius publica. Et si contingat eum promoverj per duos doctores, non possit unum jnduere sine alio, et teneatur ambos induere de eodem panno; declarantes quod nullus doctor presentatus possit venire ad sanctum Petrum indutus cum doctorando ad publicam alicuius doctorandj, sine alio vel alijs presentantibus indutis, sub pena cuilibet doctori contrafacienti XXV. librarum bon, exigendarum et applicandarum, ut supra, et privationis collegij; a qua privatione non possit restituj nixi prius satisfecerit doctori vel doctoribus sub quo vel quibus fuerit promotus. Qua satisfactione facta, possit reponj cum consensu [441] maioris partis collegij ad dictum collegium, scrutinio celebrato cum fabis albis et nigris. Et quod dictus promovendus in eius privata teneatur satisdare doctori vel doctoribus, sub quibus promovetur, de sallario eis statuto in dicta publica, ut supra. Adhicientes quod si contingat aliquem ex doctoribus nostri collegij de hijs qui scolarem presentaverint absentem esse, de cuius redditu non speretur infra XV dies, a die qua promovendus publice priorj collegij predicti dixerit se publice velle promoverj, vel defunctum, dum tamen non sit absens alicuius cure occaxione vel infirmitatis aut rei publice causa, quod tunc, et eo casu, scolaris predictus promovendus solvere teneatur collegio predicto libras sex bon., distribuendas inter doctores dicti collegij loco absentis vel defuncti. Si vero pro suo honore induere voluerit unum doctorem, sub quo non fuerit promotus loco absentis, tunc et eo casu possit induere unum ex doctoribus dicti collegij, quem voluerit. Qui doctor, sic indutus loco defuncti vel absentis, solvere teneatur collegio libras decem Bon.; si autem duos aut plures pro suo honore, tunc doctores sic indutj solvere teneantur collegio predicto libras decem bon. pro quolibet, s[c]ilicet loco absentium presentantium scolarem predictum vel defuncti.