[437] Constituimus et ordinamus et firmamus quod constitutiones et sigillum nostri collegij debeant esse penes priorem dicti collegij, qui pro tempore fuerit; quas constitutiones et sigillum teneatur dictus prior statim in coadunatione, quam primo fieri fecerit novus prior, reassignare sequenti priorj. Et ipsam reassignationem facere scribj et redigi in actis notarij dicti collegij, ut sic possint esse salve perpetuo, sub pena decem librarum bon. priori obmittentj facere predicta, vel aliquod predictorum, exigenda et dividenda inter collegium. Et si contingerit perdi dictas constitutiones vel sigillum, teneatur dictus prior, penes quem erant dicte constitutiones et sigillum, infra unum mensem, omnj exceptione remota et reiecta, facere exemplare de novo dictas constitutiones ad exemplum illarum que erunt in sancto Francischo, scilicet in sacristia dictorum fratrum minorum, omnibus suis expensis, manu notarij collegij prelibatj. Et facere fieri sigillum tale ut est illud quod habet ad presens dictum collegium, omnibus expensis prioris predicti, qui non reassignaverit dictas constitutiones et sigillum, omni exceptione cessante, sub pena XXV librarum bon. exigenda et dividenda, ut supra. Mandantes jnsuper quod nullus tante temeritatis vel audatie sit, qui audeat vel presumat sigillare sigillo dicti collegij aliquam literam sine licentia maioris partis doctorum collegij predicti, de qua licentia constet per acta dicti notarij dicti collegij, sub pena perpetue privationis de dicto collegio ipso jure et facto. Et nichilominus [sub] pena XXV librarum bon. priorj collegij, penes quem fuerit dictum sigillum, nixi expresse suam ignorantiam probet.