Constituimus et ordinamus quod doctores Bon., ut supra, possint legere in s[c]ientia medicine in civitate Bon. quacunque hora libros ordinarios ordinatos et ordinandos per eos ad quos spectat, horis consuetis, prout ad eorum processerit volontatem. Et quod dicti doctores vel aliquis eorum non audeat vel presumat loco eorum vel alterius eorum subrogare aliquem ad legendum vel permittere legere ordinarie dictos libros in s[c]ientia medicine, de mane, qui non sit civis, ut supra, civitatis Bon., nec paciatur quod aliquis subrogetur vel pro eo legat, sub pena X. lib. bon.; quam penam si non solverit infra octo dies post mandatum dominj prioris, ipso jure et facto privatus sit et esse intel[l]igatur de collegio donec solverit dictam penam. Et quod nullus qui non sit vere civis Bon. originarius paterna et propria origine, audeat vel presumat legere in dicta civitate bon. de mane dictos libros. Et quod doctores procurent toto posse suo, quod presens constitutio inviolabiliter observetur.