Considerantes quod propter lecturam ordinariam atributam doctoribus civibus bon. in medicina et continuatam per eos, studium in ipsa civitate est auctum et conservatum, constituimus et firmamus quod ipsum collegium et doctores eiusdem collegij vinculo sacramenti, ab eis et quolibet eorum prestandj, et precise, teneantur facere et curare quantum in eis est, et eorum fuerit possibilitas, quod doctores Medicine cives civitatis Bonon., legant et presint lecture ordinarie de mane, ut moris est et fuit per tempora logiora. Et quod ipsi doctores Bonon. nativi, ut supra, tantum, et nullus alius, presint lecture supradicte ordinarie, vel legant ordinarie de mane. Et quod per aliquem quovis modo, collore vel causa non possit ipse doctor civis Bonon. impediri, vel ab eis doctoribus civibus Bon. removeri predicta sedes ordinaria. Et ad huiusmodi observationem teneantur dicti doctores et collegium prestare auxilium, consilium et favorem ac juramentum pro premissorum efficaci observatione, s[c]ilicet, si contingat, quod deus advertat, [431] aliquem doctorem Bonon., ut supra, quovis modo impedirj vel molestarj in dicta lectura, vel alium doctorem quam civem, ut supra, velle legere ordinarie de mandato vel preponj ipsi lecture quovis modo vel collore, ad eius instantiam vel non, teneantur omnes doctores dicti collegij toto posse resistere quibuscumque modis etiam per desistentiam a lectura doctorum predictorum civium, et pro desistentia a cura infirmorum et a conscilijs omnium doctorum in quibuscumque casibus emergentibus in civitate bon. Et prior, qui pro tempore fuerit, vel alius eius locum tenens, tunc teneatur mandare predictas desistentias et alia quecumque viderint expedire pro observatione predictorum, sub pena ipsi priorj vel eius locum tenentj quingentorum florenorum auri, applicandorum pro tertia parte camere com[m]unis Bon. et pro alia tertia parte collegio antedicto et pro reliqua tercia parte domino Potestatj Bon. Et ipse dominus Potestas ex officio ipsius teneatur dictam penam, ut supra, exigi facere et executioni mandare. Et nichilominus ipso jure et facto sit privatus ab ipso collegio et ad eandem penam teneatur quilibet doctor ei non parens in predictis mandatis desistentiarum vel aliquo eorum. Volumus etiam quod quilibet forensis examinandus antequam admictatur ad privatum examen, jurare teneatur tempore presentationis de ipso fiende priori, in manibus prioris, qui pro tempore fuerit, vel offitium prioratus gerentis, vel alterius cui prior vel eius vices gerens com[m]iserit, de non legendo ullo tempore sponte vel coacte cum alicuius mandato aut sine, in medicina de mane ordinarie in civitate bon., vel lecturam de mandato suscipere directe vel indirecte, nec non similiter jurare de non procurando vel attentando aggregarj collegio predicto vel in eo assumj et de non presentando ullo tempore per se vel alium aliquem scolarem ad aliquod examen privatum vel publicum fiendum in dicta scientia medicine, et de non tradendo per se vel alium ullo tempore alicui promovendo ad doctoratum in dicta scientia medicine in ipsa civitate Bon. librum [vel] insignia aliqua doctoratus, et de non exercendo aliquem actum de predictis vel aliquem alium, pertinentem ad doctores collegij tantummodo, sponte vel coacte, cum alicuius mandato vel sine, ut supra, sub pena quingentorum florenorum aurj a quolibet et qualibet vice exigenda, et tociens com[m]it[t]enda quotiens contrafactum fuerit, et applicanda ut supra; que pars applicanda collegio non possit remittj directe vel per obliquum. Que omnia collegium et doctores dicti collegij effectualiter et precise observare debeant, ut supra. Teneatur etiam dictus forensis, presentandus ut supra, jurare, ut supra, de non veniendo ad publicum examen vel recipiendo aliqua insignia doctoratus prius alibj quam in civitate bon. Providentes etiam quod contra predicta vel aliquod predictorum non possit ar[r]engarj, consulj aut fieri aliqua dispensatio, suspensio, annullatio vel revocatio modo aliquo, causa vel colore. Et si contingeret per aliquem vel ab aliquo secus fieri in predictis vel aliquo predictorum, arengando, consulendo, proponendo vel consenciendo tacite vel expresse aut pro venientj ad aliquem actum per quem predicta vel aliquod predictorum peterentur, obmit[t]erentur vel optinerj possent directe vel per obliquum, ipso jure incidat in penam quingentorum florenorum aurj com[m]ittenda et applicanda, ut supra. Et nihilominus talis contrafaciens omni honore, jure et com[m]odo dicti collegij sit ipso jure et facto privatus perpetuo, in quo nunquam possit aggregarj. Civem autem civitatis Bon. intel[l]igimus, quantum ad nostras constitutiones, eum qui sit vere et naturaliter civis Bonon. originarius, origine propria et paterna, vel propria et avita, vel propria et peravita. Propria autem debeat vere probari, ut in principio, sub Rubrica de personis que possunt esse de collegio, habetur. Que probatio fiat et fieri debeat coram priore collegij, qui pro tempore fuerit, nec non et quatuor doctoribus de antiquioribus [432] dicti collegij specialiter ad hoc electis et deputatis per collegium antedictum, qui antiquiores sint secundum ordinem dictj collegij. Qui prjor et quatuor doctores predicti simul omnes recipiant probationes predictas per se tantum et fideliter et diligenter advertant, sub vinculo juramenti, ne aliqua fraus committatur. Et si ipsi vel aliquis alius doctor dicti collegij sciret vere vel presumptive, vel probabiliter titubaret, aliquam fraudem committi, teneatur statim notificare priorj dictj collegij vel eius locumtenentj; qui prior, vel eius locum tenens, teneatur statim ipsum collegium congregare, et doctoribus ipsius collegij hoc notificare, ut ipsi provideant omnibus modis et remedijs ne fiat fraus aliqua, tenendo in secreto nomen doctoris, qui hoc notificaverit, si ipse doctor voluerit, sub pena cuilibet doctori non notificantj, ut supra, ducentorum florenorum aurj applicandorum ut supra. Et per notarium collegij probationes et alia in actis reducantur. Qui prior et alij quatuor doctores antiquiores ante omnia jurent corporaliter ad sancta dei evangelia, in predictis, remotis hodio et amore, timore, prece et precio, se dictas probationes legaliter et fideliter audire et recipere secundum quas eum civem vel non civem quo ad predicta pronunpciet, et pronumpciare teneatur prior collegij, secundum relationem dictorum doctorum si concordes fuerint, aliter prout maior pars eorum concors fuerit. Que pronunpciatio et declaratio fiat in presentia collegij et doctorum eiusdem; cui pronunpciationi stetur, nec contra ipsum quoquomodo fierj possit aut disponj, sub pena periurj.