[425] In Christi nomine. Ad honorem et reverentiam omnipotentis dei nec non Beate Marie semper virginis gloriose matris eius, Beatorum confessorum Petronij et Ambroxij, Jeronimi et Augustinj, Thome de Aquino et militantis Ecclesie doctorum ac Beatorum Cosme et Damiani tociusque celestis curie triunfantis, ac etiam ad magnificentiam et exaltationem populi et comunis Bononie et amatorum eiusdem et ad perpetuam doctrinam, regulam et observationem collegij doctorum scientie medicine Civitatis Bononie. Hec sunt statuta collegij predicti doctorum s[c]ientie medicine, vixa, cor[r]ecta et examinata et etiam ex antiquis voluminibus costitutionum dicti collegij in formam redacta, ac de novo compillata per egregios scientie Medicine doctores, videlicet per magistrum Paulum de Buvalinis priorem dicti collegij, et per magistrum Petrum Aristotillis, Magistrum Martinum de Erris, Magistrum Guidonem de Privitis, Magistrum Baldesseram de Confortis, Magistrum Johannem de Barberijs, Magistrum Matheum de Varignana, Magistrum Johannem de Chazano, Magistrum Guidoctum de Henrigiptis, [426] Magistrum Petrum de Verignana, Magistrum Petrum de Castro Sancti Petri et Magistrum Johannem de Muglo, ex commissione eis facta per dictum collegium et publicata ac iurata et firmata et publicata in dicto collegio tempore honorabilis prioris et prioratus dicti magistri Petri de Varignana, honorabilis prioris dicti collegij, per infrascriptos doctores dicti collegij, videlicet per magistrum Petrum de Varignana priorem predictum, Magistrum Martinum de Erris, dictum magistrum Baldeseram, Magistrum Christopharum de Honestis, Magistrum Iohannem de Barberijs, Magistrum Matheum de Varignana, Magistrum Johanem de Chazano, Magistrum Guidoctum de Henrigiptis, Magistrum Johannem de Muglo et magistrum Francischum de Cultris, sub anno Nativitatis domini nostri Jesu Christi Millesimo trecentesimo septuagesimo octavo, indictione prima, die trigesimo mensis Junij, Pontificatus sanctissimi in Christo patris et domini domini Urbani divina providentia pape vj, anno primo, et scripta et lecta per me Egidium condam ser Francisci de planorio Civem bon., publicum imperiali comunis Bonon. ac curie episcopalis Bon. auctoritate notarium, et nunc notarium dicti collegij, de mandato predicti magistri Petrj de Varignana et aliorum doctorum collegij predicti in ipso collegio presentialiter existentium.