[473] Ad honorem et gloriam omnipotentis dei et gloriose virginis marie matris [eius] totiusque curie supernorum, nec non ad honorem et laudem Beatissimi et sanctissimj Luce Evangeliste et sanctorum Cosme et Damianj, statuimus et ordinamus quod omnj anno in principio nostri studij, sermone celebrato, teneantur et debeant festum facere cum tubis et timpanis et zalamella nostri collegij ac universitatis eiusdem singuli et omnes doctores utriusque membri collegij, medicorum videlicet [et] artistarum, et qui in matricula fuerit perfectorum cirusicorum omnesque scolares de universitate dictarum facultatum in Ecclesia Beati Luce, que est in porta de Castello, aut in Ecclesia sanctorum Cosme et Damianj, que est penes pontem de fero, aut in aliqua Ecclesia in qua fuerit alter alicuius sanctorum predictorum. Et quilibet doctor utriusque membrj collegij solvere teneatur soldos tres bon., et quilibet, qui fuerit de matricula perfectorum cirusicorum, solvere teneatur soldos duos bon. Et omnes et singuli scolares, qui de universitate vel matricula fuerint scolarium dictarum facultatum, solvere teneantur soldum unum bon., et cum duplerijs et candelis seriose et ordinate vadant ad dictum festum, servato semper ordine preposterioritatis inter omnes. Et quod Rector universitatis scolarium antecedat, et priores utriusque collegij sequantur, ipsum tenentes in medio in eundo et redeundo ad dictum festum. Qui tamen Rector et priores precipere faciant per Bidellos suos omnibus et singulis doctoribus cirusicis et scolaribus supradictis per unam diem antea, quod solvere teneantur Massario collegij physicorum predictas pecunie quantitates, et pro duplerijs et candelis, vel alijs oblationibus fiendis supradictis Ecclesijs, dictam pecuniam debeant dispensare sub pena cuilibet contrafacienti soldorum decem Bon., nisi solverit, nulla aceptata excusatione vel defensa. Item statuimus quod quilibet magistrorum nostri presentis collegij physice facultatis, qui dignitates non habuerit in conventu, ad inefabilem medicine scientiam extolendam, illas possit assumere publice vel private, dumtaxat solverit cuilibet doctori prefati collegij quatuor soldos bon. et domino Archidiacono ac nostro priori cuilibet unum Biretum, cirotechas et anulum precij saltem viginti soldorum bon. Adiungentes et iniungentes quod quicunque doctor prefati collegij, qui dignitates non asumpserit vel habuerit, jnmunis erit a salario supradicto, scilicet inter habentes dignitates predictas tantum dictum salarium partiatur.