Constituimus et ordinamus et firmamus quod constitutiones et sigilli nostri collegij debeant esse penes priorem dicti collegij, qui pro tempore fuerit, quas constitutiones et sigillum teneatur dictus dominus prior statim in choadunatione, quam primo fierj fecerit novus prior, reassignare sequenti priori et ipsam registrationem facere scribi et registrari in actis notarij dicti collegij ut sic possint esse salve perpetuo, sub pena decem librarum bon. priori obmitenti facere predicta, vel aliquid predictorum, exigenda et [465] dividenda inter collegium; et si contingerit perdi dictas constitutiones et sigillum, infra unum mensem, omnj exceptione remota et reiecta, facere exemplare de novo dictas constitutiones ad exemplum illarum, que erunt in sancto francisco, scilicet in sacristia fratruum minorum, omnibus suis expensis, manu notarij collegij prelibati, et facere fieri sigillum tale ut est illud, quod habet ad presens dictum collegium, omnibus expensis prioris predicti qui non reasignaverit dictas constitutiones et sigillum, omnj exceptione cessante, sub pena vigintiquinque librarum bon. exigenda et dividenda ut supra. Mandantes insuper quod nullus tante temeritatis vel audatie sit, qui audeat vel presumat sigillare sigillo dicti collegij aliquam literam sine licentia maioris partis doctorum collegij predicti, de qua licentia constet per acta dicti notarii dicti collegij, sub pena perpetue privationis de dicto collegio ipso jure et facto, et nichilominus pena vigintiquinque librarum bon. priori collegij, penes quem fuerit dictum sigillum, nisi expresse sua ignorantia probet.