Cum jnsurgat necessitas propter peragenda negotia dicti collegij, notarium specialem ac Bidellum specialem habere, qui officia limitata habeant et habere debeat, et cum omnis labor optet premium, hac nostra constitutione providemus, ordinamus et firmamus quod in quacunque electione fienda de notario et bidello antedicti collegij hic modus et forma debeat observari, videlicet quod dominus prior collegij, qui pro tempore fuerit, post mortem vel ca[s]sationem presentis notarij, vel bide[l]li, vel alterius notarij, vel bidelli, qui pro tempore fuerit, infra terciam diem debeat notificare et jntimare doctoribus dicti collegij, et in dicto collegio, qualiter necessarium et opportunum est, procedere, et ad [463] ellectionem notarij novi, seu Bidelli, secundum quod casus acciderit. Et quod quilibet doctor, qui sciret vel cognosceret aliquem ydoneum et suficientem ad dictum officium vacans exercendum, debeat nomen et pronomen et cognomen in scriptis dare dicto domino priori, dumtamen talis sit homo bone conditionis et fame et civis civitatis Bononie, origine propria et paterna, maior vigintiquinque annis, bonus, suficiens et ydoneus notarius, in societate notariorum civitatis bononie descriptus ante per quinque annos, et artem notariatus bene et legaliter publice exercuerit et exerceat. Et Bidel[l]us sit civis civitatis bononie ratione originis proprie, et homo bone conversationis, vite et fame, et maior vigintiquinque annis, sub pena doctori, danti nomen alicuius contra formam predictam, viginti soldorum bon; a qua pena ratione ignorantie aliquo modo se non valeat excusare, retinenda per priorem collegij antedicti, qui pro tempore fuerit, et dividatur inter doctores dicti collegij principaliter incorporatos, ut supra. Qui dominus prior infra octo dies post notificationem predictam teneatur et debeat, sub pena quinque librarum bon., retinenda per priorem subsequentem, vel eius vices gerentem et dividenda inter dictos doctores, facere congregare collegium antedictum et in dicta congregatione publicare omnia nomina sibi data in scriptis per dictos doctores, vel eorum alterum, et proponere quis eorum videtur dicto collegio et doctoribus sufficientior et ydoneor ad dictum officium vacans exercendum. Et ille qui plures voces habuerit, secundum quod fit in ellectione prioris, sit et esse intelligatur dicti collegij officialis et ad dictum officium, de quo agitur, exercendum, et ellectio que reperiatur facta contra vel preter formam predictam, et de persona que non sit condicionis et qualitatum predictarum, ipso jure sit nulla. Ac etiam comoditatem aliquam vel beneficium percipere non valeat neque possit notarius et Bidellus ellectus secundum formam predictam; ac etiam notarius et bidellus, qui nunc est, teneatur jurare in manibus dominj prioris, qui pro tempore fuerit, ad omnem requisitionem dicti domini prioris, eorum officia bene et diligenter et solicite et sine aliqua fraude et malicia exercere et administrare, et parere et obedire eidem domino priori et doctoribus collegij antedicti in his que spectant ad eorum offitia, et in omnibus licitis et honestis. Offitia vero dictorum notariorum et Bidelli volumus esse in hac forma, videlicet quod notarius dicti collegij, qui nunc est, vel, pro tempore fuerit, teneatur et debeat scribere et in publicam formam redigere in cartis pecudinis et edinis omnes presentes constitutiones et de ipsis facere duas copias, quarum copiarum una claudatur et sigilletur sigillo collegij doctorum predictorum et deponatur ad perpetuam rei memoriam in sacristia et penes sacristiam fratruum minorum de Bononia, allia vero remaneat et remanere debeat penes notarium dicti collegij, vel penes priorem collegij, qui pro tempore fuerit, et continue ad requisitionem prioris, qui pro tempore fuerit, una cum doctoribus dicti collegij interesse, et scribat in libro suo, quem penes se debeat retinere, omnia et singula actanda et fienda per dictum dominum priorem et doctores ipsius collegij ad dictum collegium spectantia et pertinentia, et loca congregationum, annum, mensem, et diem et fabas dare albas et nigras predictis doctoribus, quando partita ponuntur per dictum priorem et habere unum Busolum in quo debeant poni et stare fabe, que dantur per prelibatos notario. Quem busolum debeat habere et retinere in manibus antiquior doctor dicti collegij separatim a doctoribus collegij antedicti; et postquam fabe fuerint numerate per priorem [464] collegij antedicti, vel vices gerentem, scribere numerum dictarum fabarum et quicquid obtentum fuerit, et in dicto collegio scribere, et redigere omnia que fient, et etiam scribere omnes ellectiones priorum dicti collegij et officialium ipsius ad omnes et singulos actus congregationis et congregationum factos et fiendos et gestos et gerendos per priorem predictum et collegium, et subscribere in dicto libro, prout processerit de volumptate dicti domini prioris, et generaliter omnia et singula facere et exercere, que videbuntur utilia vel necessaria et opportuna fieri pro collegio preljbato et doctoribus ipsius, juxta ipsius notarij possibilitatem. Bidellus vero predictus eo modo et forma teneatur et debeat ad requisitionem prioris, qui pro tempore fuerit, collegium dictorum doctorum et doctores ipsius collegij requirere ad congregationes fiendas et ibidem interesse continue in horis sibi impositis, iniunctis et iniungendis, et imponendum et iniungendum per priorem predictum. Et ad omnem locum accedere una cum dicto priore et collegio doctorum ipsius totiens quociens fuerit necessarium et opportunum ad omnem allium locum pro libito volumptatis dicti domini prioris et collegij doctorum predictorum, et generaliter omnia et singula facere, dicere et exercere et adimplere, ac cum effectu mandare, que fuerint sibi iniuncta, ut supra, et condempnari possit vel possint notarius et bidellus et quilibet ipsorum per priorem, qui pro tempore fuerit, incontinenti post quinque dies, videlicet notarius usque ad quantitatem viginti solidorum bon., nisi alliqua iusta et rationabilis causa intervenerit, que debeat probari vel improbari per dictum priorem una cum duobus doctoribus dicti collegij, quos ellegerit dictus dominus prior, qui pro tempore fuerit; et Bidellus in quindecim soldos bon., nisi iusta causa intervenerit, approbanda, ut supra. Salaria autem sua debeant esse tanta in hac forma, videlicet quod notarius dicti collegij, qui nunc est, vel pro tempore fuerit, habeat et habere debeat a quolibet scolari cive libras quatuor bon., a forense vero, cuiuscunque status et conditionis existat, transire volenti ad privatum examen in medicina viginti soldos bon., et in publica viginti soldos bon. Et quod nullus doctor dicti collegij aliquem ex predictis debeat presentare ad aliquod publicum vel privatum examen, nec aliqua insignia doctoratus dare, nisi prius satisfecerit notario vel Bidello, prout superius est scriptum, sub pena cuilibet doctori, venienti contra predicta vel aliquid predictorum, quinque librarum bon., applicanda collegio antedicto et dividenda ut supra. Et quod aliquis ex doctoribus dicti collegij non debeat interesse examinationi ipsius conventuandi, sub pena quadraginta soldorum bon., applicanda et dividenda, ut supra, nisi satisfactum fuerit dictis Bidello et notario, ut superius, et hoc pro honore dicti collegij conventuandi.