Constituimus et ordinamus quod doctores bononienses, ut supra, possint legere in scientia medicine in Civitate Bononie, quacunque hora, libros ordinarios, ordinatos et ordinandos per eos ad quos spectat, horis consuetis, prout de eorum processerit voluntate. Et quod dicti doctores, vel aliquis eorum, non audeant vel presumant loco eorum, vel alterius eorum, subrogare aliquem ad legendum, vel permitere legere ordinarie dictos libros in scientia medicine, qui non sit collegiatus, ut supra, nec patiatur quod aliquis subrogetur, vel pro eo legat, sub pena decem librarum bon. Quam penam si non solverit infra octo dies post mandatum dominj prioris, ipso jure et facto sit privatus, et esse intelligatur, de collegio, donec solverit dictam penam. Et quod nullus, qui non sit collegiatus, ut supra, audeat vel presumat legere in dicta Civitate de mane dictos libros; et quod doctores procurent toto posse suo, quod constitutio presens jnviolabiliter observetur.