Statuimus et ordinamus quod doctores ipsius collegij nostri continuo inter se habeant et habere debeant unum priorem ipsius collegij; qui prior elligatur ad brevia secundum modum [h]actenus observatum, ubi et quando processerit de volumptate prioris et maioris partis collegij. Quod si non, fiat ellectio per voces, cum fabis albis et nigris, et ille qui plures fabas albas habuerit jntelligatur esse prior; ad quam ellectionem prioris novi teneatur prior precedens procedere, convocato collegio per quinque dies ad minus ante finem sui officij, sub pena periurij. Cuius prioris sic creati et ellecti, modo predicto, offitium incipere debeat finitis tribus mensibus prioris, tunc suum offitium debentis finire, et duret tribus mensibus, ut supra et non ultra, et aliorum priorum sic creandorum jncipere debeat dictis tribus mensibus, et duret ut supra. Qui prior sic ellectus, tempore dicte ellectionis, si presens fuerit, alias in proxima congregatione fienda de dicto [456] collegio et doctoribus ipsius, juret et jurare teneatur corporaliter ad sancta dei evangelia, manu tactis scripturis, in manibus tunc prioris, collegium prelibatum eiusque iura totis viribus defensare, et constitutiones eiusdem collegij observare, juxta ipsius possibilitatem et non pati collegium predictum congregari nec etiam congregari facere pro aliqua re vel facto, quo[d] videatur reddere posse seu redundare posse in dapnum, dedecus vel obrobrium dicti collegij; et quemlibet doctorum dicti collegij venientem contra constitutiones ipsius collegij vel aliquam earum verbo vel facto condempnare, secundum modum et formam dictarum constitutionum et penas in quibus incurisset, seu incurissent, vigore dictarum constitutionum, exigere seu exigi facere infra tempus eius prioratus officij, sub pena dupli eius quod fuerit condempnatus ille a quo exigere debuerit; item etiam qu[e]cumque eidem domino priori in secreto comissa per dictum collegium in secreto retinere et non propalare, nisi si et quando processerit de volumptate doctorum dicti collegij. Et etiam quod in dicto collegio non proponet nec proponi consentiet directe vel per obliquum quod aliqua constitutio, vel eius pars, tollatur vel dispensetur, nisi si et in quantum caveretur et permicteretur ex forma dictarum constitutionum vel alicuius earum, vel nisi processerit de volu[m]tate trium partium ex quatuor partibus doctorum dicti collegij presentialiter existentium in Civitate Bononie, scrutinio cum fabis albis et nigris inter ipsos primo legiptime celebrato. Et quod congregabitur et congregari fatiet predictum collegium totiens quotiens fuerit congruum et opportunum fore pro bono, honore comodo et utilitate dicti collegij et doctorum eiusdem et non aliter nec alio modo nec alia causa; quod si forte aliter factum fuerit, ipsa congregatio et omnia et singula in ea ordinata vel facta, ipso jure et facto sint et intelligi debeant esse cassa et vana ac nullius efficatie, et etiam quotiens fuerit requisitus per tres doctores dicti collegij. Volumus etiam quod post ellectionem prioris elligantur duo consciliarij secundum formam predicte constitutionis de electione prioris, qui habeant priori consulere, sub vinculo juramenti eis prestandi, de hijs que crediderint honorabilia fore, pacifica et utillia ipsi collegio et doctoribus eiusdem, ac cum dicto priore de allia facere secundum consuetudinem.