Constituimus et ordinamus nos omnes jnfrascripti doctores, quorum nomina sunt hec, videlicet M. Antonius de Feris ad presens prior, M. Paulus de bualinis, M. Baldassar de Confortis, M. Martinus de Ricardis, M. Iohanes de Cazano, M. Petrus de [454] Varegnana, M. Johanes de Muglio, M. Francischus aristotilis, M. Franciscus de Cultris, M. Paulus de calorijs, M. Bertolomeus de Barberijs, M. Guizardus de Portanova, actualiter incorporati et pacifice firmati in Collegio doctorum scientie Medicine Civitatis Bononie ac ipsum Collegium representantes, quod nullus de ceptero possit ad ipsum collegium, vel ad honores aut comoda dicti Collegij admitti, nisi sit et fuerit verus civis civitatis Bononie ratione originis proprie et paterne, vel proprie et avite vel proprie et proavite. Quam originem paternam vel avitam vel proavitam sufficiat per tres vel quatuor testes fide dignos probare de publica voce et fama, sed origo propria probetur per quatuor testes fide dignos, qui sint cives Bononie; et insuper quod reperiantur in scripturis Memorialium Comunis Bononie vel notariorum publicorum comunis Bononie ipse vel sui ascendentes descripti inter cives Bononie et ad extima civium civitatis Bononie, et qui non fuerit directe vel per obliquum contra ipsum collegium vel eius honorem, et qui sit doctor habilitatus immo approbatus in privato examine tamquam civis Bononie origine propria et paterna a duabus partibus doctorum dicti collegij, et presentatus ad publicum et privatum examen de consensu doctorum dicti collegij Bononie per dominum Archidiaconum civitatis Bononie seu alium vel alios dictum offitium exercentes in civitate Bononie, et qui legerit per unum annum ad minus in scolis publicis Medicinam, et homo bone vite, conversationis et fame et de consensu doctorum collegij antedicti, scruptinio prius celebrato cum fabis albis et nigris, iuxta modum et formam constitutionis sequentis, aprobate in privata et publica a dicto Collegio et posita in dicto collegio. Et debeant esse dicti de dicto collegio ad plus collegiati et principaliter incorporati quindecim numero, quorum alter vel alteri possit vel possint esse presentandi vel presentantes scolares et tre Bononienses, ut supra, supranumerarij ad plus, qui succedant loco absentium secundum ordinem infrascriptum. Et quod quilibet, qui intrare voluerit dictum collegium, s[c]ilicet in numero predicto ipsius, teneatur observare infrascripta, scilicet dare peticionem suam in scriptis priori, vel qui pro tempore fuerit, in presentia duorum ad minus doctorum dicti collegij. Qui prior presentet dictam petitionem collegio doctorum vel duabus partibus eorum, et ipse talis qui aggregarj voluerit dicto collegio teneatur fidem antedicto priori et prefatis duobus doctoribus facere de omnibus suprascriptis et solvere et depoxitum facere ante aggregationem fiendam de dicto collegio pro eius introytu dicto domino priori vel notario dicti collegij treginta duchatos auri, nisi fuerit frater, filius vel nepos alicuius doctoris dicti collegij; quia tunc et eo casu solum deponere teneatur, ut supra, quindecim ducatos auri, comunicandos, statim facto dicto introitu antedicti collegij, inter dictos doctores dicti collegij jncorporatos et collegiatos principaliter, ut supra, et principaliter existentium in civitate Bononie et absentes rei publice causa; et statim, facto scruptinio, ut supra, et obtento quod in dicto collegio ag[g]regari debeat, teneatur ipse talis jurare in manibus prioris, qui pro tempore fuerit, et corporaliter ad sancta dei evangelia, tactis scripturis, quod servabit constitutiones dicti collegij factas et fiendas, et omnia et singula contenta in dictis constitutionibus et qualibet earum, [455] et quod ipse re, verbo vel facto numquam erit contra dictum collegium et honorem, et toto posse defendet dictum collegium, jura, jurisdi[c]tiones et honores collegij prelibati et cuiuslibet doctoris eiusdem, et quod cuilibet doctori ipsius collegij semper reverentiam exibebit, et quod obediet priorj ipsius collegij, in omnibus que spectant ad eius offitium et honorem collegij antedicti et alijs licitis et honestis, cui juramento, si in aliqua sui parte contravenerit, vel contravenienti consenserit, ipso facto sit privatus ab ipso collegio et quolibet eius honore et comodo, nec aliquo modo possit infra quinque annos restituj, nec post etiam, nisi fuerit obtemptus per tres partes ex quatuor doctorum omnium dicti collegij. Modum autem suc[c]edendi suprascriptorum supranominatorum esse volumus et declaramus in hac forma, videlicet quod loco cuiuslibet mortuj naturaliter primus supranumerarius quo ad omnia succedat; et sic sucessive loco secundi et cepterorum secundus et cepteri loco eorum, attento ordine prioratus dicti collegij, jnter eos vero sucedant; in loco vero cuiuslibet absentis non causa rei publice, sucedant modo supradicto dicti tres supranumerarij in omnibus, preter quam in hijs, que reperirentur prohibita ex forma presentium constitutionum, dum tamen, si revertatur absens locum suum statim ipso jure et facto recuperet, et subrogati vel subrogatus juxta formam predictam loco mortuorum aut absentium, ut supra, ultimo loco numero adimpleto secundum formam predictam dictorum collegiatorum et incorporatorum, ipsis vel altero eorum revertentibus, ut supra, ipso jure et facto tamen primum supranumerarium recipiat, salva semper constitutione fienda de privilegijs concedendis filijs et fratribus ac nepotibus doctorum tam viventium quam mortuorum, declarantes etiam quod, in quacunque parte nostrarum constitutionum fiat mentio de vero cive vel de vero Bononiense, jntelligatur, ut supra in principio huius constitutionis, de eo qui est vere et naturaliter civis Bononiensis [origine] propria, paterna, vel propria et avita, vel propria et proavita, secundum formam nostre constitutionis et reformationis, posit sub Rubrica de modo et forma conservandi studium in Civitate Bononie etc. Qui vero fuit seu fuerit admissus ad privatum examen in dicta scientia medicine non tamquam Civis Bononiensis ratione originis proprie et paterne vel proprie et avite vel proprie et proavite, nec satisdederit de as[s]umendo in dicta s[c]ientia privatum et publicum examen tamquam civis Bononiensis, ratione originis proprie et paterne, et qui allias solempnitates in dictis nostris constitutionibus contentas non servaverit, perpetuo non possit esse de dicto collegio, nec ipsi collegio aggregari nec alliquo comodo et honore dicti collegij gaudere.