Item statuerunt, ut ignorantia non excuset [ali]quem, et cum oporteat quedam statuta legi per scolas ut omnibus pateant, quod hec statuta in presenti contenta statuto legantur, et legi debeant per scolas, primum de pena eorum qui se absentant propter evitare offitium Rectoratus, secundum de electione eorum qui debent denuntiare doctores, tertium de inchoatione studij et festivitatibus celebrandis, quartum de modo et ordine servando in disputationibus, quintum de modo arguendi ad quamlibet questionem, sextum de questionibus de quolibet disputandis per doctores medicine, septimum de questionibus disputandis per doctores artium, octavum quod novi scolares teneantur [305] se presentare coram domino Rectore, nonum de matricula scolarium medicine quolibet anno fienda, decimum [de matricula] scolarium artistarum quolibet anno fienda, undecimum de pena ludentium ad ludum taxilorum, duodecimum quod quilibet teneatur audire pacifice precepta Rectoris, tertiumdecimum de modo et forma servandi festum sancti Petri et sancte Marie, et generaliter quodlibet aliud statutum quod cavetur legi debere per scolas. Item quod dicta statuta et omnia alia statuta dicte Universitatis legantur et legi debeant secundum beneplacitum Rectoris, qui pro tempore fuerit, pena notario pro quolibet statutorum obmisso solidorum duorum bon.