[297] Item statuerunt quod aliquis scolaris cuiuscumque facultatis, aut qujvis alius ut scolaris se gerens, non possit nec valeat gaudere benefitio aliquo, seu commodo Universitatis predicte, seu statutorum ipsius, aut per ipsam Universitatem vel Rectorem ipsius aut statuta dicte Universitatis defendi, nisi sit scolaris iuratus, qui iuraverit servare statuta Universitatis et obedire Rectori in licitis et honestis, ut supra. Decernentes insuper quod aliquis doctor seu professor alicuius alterius scientie quam medicine vel artium, non possit pro aliquo vel contra aliquem procurare vel advocare aut sollicitare palam vel secrete, nisi iuratus fuerit servare statuta et obedire Rectori, ut supra, salvo quod in causa, seu causis, litibus seu questionibus ipsius vel suorum licite esse, advocare et procurare possit, pena cuilibet advocanti, procuranti, sollicitanti, et pro qualibet vice, quadraginta solidorum bon., quam penam solvere teneatur quilibet contrafaciens infra tertiam diem postquam dictam penam incurrerit, sub pena privationis. A qua privatione restituj non possit, nisi dicta pena soluta. Et quilibet possit accusare et denuntiare, et habeat medietatem condempnationis. Et Rector quilibet, quj pro tempore fuerit, possit et teneatur procedere ad petitionem cuiuscumque et deliquentes condempnare, sub pena centum solidorum bon. eidem Rectori, eidem per Syndicos auferenda in fine suj offitij.