Item ad hoc, ut fratres beati dominicj et fratres sancti Iacobi ordinis sancti Augustini et fratres ordinis sancte Marie de Monte carmelo sint favorabiles in honorando Universitatem et conventus fiendos de scolaribus Universitatis eiusdem, aut ipsi Universitati suppositis, statuerunt quod quolibet anno per scolares Universitatis et doctores fiat festum ad infrascriptas ecclesias et quamlibet earum, si fratres, de cuius ecclesie festo ageretur, dederint questiones ad stationem et servabunt statuta posita sub Rubrica: de questionibus disputandis per lectores fratrum etc.; et aliter ad ecclesiam dictorum fratrum, qui predicta non observabunt, festum predictum fieri non debeat, videlicet ad ecclesiam sancti dominicj, pro festo sancti Dominici honorando, ad ecclesiam fratrum heremitarum, pro festo sancti Iacobi honorando, ad ecclesiam fratrum sancte Marie de Carmelo pro festo sancti Martini honorando, quod festum est de mense novembris, cum hac condictione, quod quilibet doctor solvat solidos tres et quilibet scolaris solidum unum, sub penis impositis de modo honorandi festum sancte Marie et sancti Petrj; et quod tunc accipiantur duo doplerij et non plus, scilibet unum pro Rectore et aliud pro Priore Collegij.