Item quod eligantur duo prosonete, sive mediatores, hospitiorum inter hospites et scolares, quos elegerunt et esse voluerunt …………… qui mediatores habeant et habere teneantur et debeant quendam quaternum, seu librum, in quo sint descripte omnes domus quas habitant omnes scolares medicine, et precium pensionis et quantitatis camararum et situm domorum, et etiam omnes alias domus quas scient fore locandas et precium earum; quem quaternum, seu librum, ad stationem et in statione generalium bidellorum tenere teneantur ad hoc, ut de ipsis omnibus possit esse notum. Et quod dicti mediatores iurent quolibet anno quod non facient locare domum pro maiore quantitate quam pro consueta pensione. Quod si fecerint, incidat in penam quilibet eorum quinque librarum bon., nisi in domo esset facta aliqua melioratio, vel domus esset melior vel pulchrior aliqua ratione, quo casu non teneatur. Item quod nullus scolaris, nisi per sejpsum conduxerit, per alios mediatores quam per dictos duos electos vel eorum alterum conducere possit aliquam domum seu hospitium, pena cuilibet scolarj conducentj viginti solidorum bon. pro qualibet vice. Statuerunt insuper, quod si aliquis scolaris conduxerit seu repertus fuerit habitare aliquam domum, quam aliquis dictorum prosonetarum ostendisset tali scolari, teneatur dicto prosonete solvere ad rationem supradictam quatuor denarios pro libra pretij quo conduxisset.