Item cum utile et necessarium sit scolaribus [providere] super extimatione librorum sub usuris ponendorum propter pecuniam accipiendam mutuo per scolares dicte Universitatis [293] et eidem subditos, et hucusque dicti scolares male tractati fuerint et continuo male tractentur, tam per feneratores, quam per extimatores librorum et dictorum feneratorum, statuerunt, ordinaverunt et firmaverunt, quod per dominum Rectorem et suos consciliarios et Massarium dicte Universitatis inveniantur feneratores, qui present scolaribus dicte Universitatis, vel dicte Universitatj subiectis, volentibus accipere pecuniam sub usuris, et prestent ad plus pro quatuor denarijs libram. Sed cum interdum sit penuria denariorum et interdum divitia apud feneratores, statuerunt quod dominus Rector et Consciliarij, quj pro tempore fuerint, una cum dicte Universitatis Depositario, habeant arbitrium addendi et minuendi de dicto pretjo usurarum pro libra qualibet secundum cursum temporis. Qui feneratores prestent et prestare debeant secundum extimationem bidellorum generalium dicte Universitatis, fiendam per eos de libris per dictos scolares sub usuris ponendis; et ad cautionem dictorum feneratorum, statuerunt quod dictj bidelli satisdent dictis feneratoribus et Rectori ac Consciliarijs et Massario predictis de extimando bene, legaliter et bona fide libros predictos sub usuris ponendos per dictos scolares, et etiam si in capite anni, a die quo dictus liber fuerit sic extimatus per dictos bidellos et subpignoratus per aliquem scolarem vel quemcumque.