Item statuerunt quod si contingeret aliquem de Universitate decedere, quod deus avertat, teneatur Rector facere nuntiarj et proclamarj per scolas ut omnes magistri et scolares exequijs defuncti, certa hora debeant interesse, quibus precise interesse singuli teneantur sub vinculo sacramenti et sub pena quinque solidorum pro quolibet scolarj quj ad dictas exequias venire pretermiserit, et cuilibet doctori decem solidorum bon., nisi iustam haberet causam excusationis sacramento vallatam, et sub pena decem solidorum cuilibet electo ad portandum cadaver, qui hoc recusaret. Quj portatores per dominum Rectorem eligantur, et antequam ad exequias vadat, ipsos ad se vocarj faciat, et eis precipiat quod portent talem defunctum, sub pena decem solidorum bon., et in virtute prestitj iuramentj. Et qui una vice fuerit electus, in alia proxima eligi non possit, nec in aliquam incidat penam, si fuerit electus et eam electionem recusaret. Et quod dominus Rector teneatur et debeat pro quibuscumque offitialibus dicte Universitatis et eorum attinentibus, Universitatem et doctores convocare et congregare, et ad omnem eorum et cuiuslibet eorum honorem seu actum ex quo honor sequi deberet, accedere, ac etiam ad ipsorum et cuiuslibet predictorum exequias ire, pena cuilibet Rectori, qui, requisitus, predicta facere obmiserit, pro qualibet vice centum solidorum bon. Et in predictis et pro predictis scolares et doctores actu legentes, sub virtute prestiti iuramenti, teneantur eidem Rectori parere et obedire. Et ultra quilibet predictorum, quj nominatim fuerit requisitus, penam quinque solidorum bon. incurrat, nisi paruerit et obedierit, nisi iusta et legitima causa excusetur. Item, quod si contingeret aliquem defunctorum esse in paupertate adeo ut expensis proprijs sepelliri non possit, teneatur ipse dominus Rector eum facere sepellirj, ut decet, expensis Universitatis, quas in casu predicto per Depositarium Universitatis predicte possint et debeant fierj, et faciendo a quantitate expensa liberetur. Teneatur etiam dominus Rector delinquentes punire secundum formam statuti, sub pena dupli in quolibet dictorum casuum. Hoc addito, quod dominus Rector non audeat convocare Universitatem pro aliquo doctore defuncto, nisi talis doctor tempore vite sue, iurare debens ex forma aliquorum statutorum, iuraverit obedire Rectorj in licitis et honestis et servare statuta Universitatis predicte et honorare exequias scolarium et [292] offitialium Universitatis defunctorum, et cum effectu servaverit, sub pena Rectori, qui pro tempore fuerit, contrafacientj centum solidorum bon.