Item quod si contingeret aliquem scolarem Universitatis infirmari, quod deus avertat, quilibet doctor legens in mane sive in nonis, cuius ille, qui esset infirmus, esset scolaris, teneatur omni die bis talem scolarem infirmum visitare, quousque fuerit infirmus, a principio sue egritudinis usque ad finem, sine aliquo precio vel salario, pena cuilibet doctori centum solidorum bon., si ire noluerit, et pro qualibet vice, qua non iret ad visitandum talem infirmum, quinque solidorum bon., nisi habuerit iustam et rationabilem causam impedimentj. Item, cum contingat aliquando scolarem infirmum non habere Bononie socios vel amicos sibi propinquos, propter quod talis infirmus patitur multa incommoda, et etiam tam de rebus infirmi quam etiam de eo aliquando aliqua enormia possint accidere, ad obvjandum predictis statuerunt quod, quando aliquis scolaris infimaretur, dominus Rector una cum consciliarijs nationis sue, ac etiam depositarius nostre Universitatis, teneatur talem infirmum visitare in sua infirmitate. Et si aliquando indigeret, teneantur sibi providere de bonis dicti infirmj, secundum exigentiam et necessitatem talis infirmj, sub pena centum solidorum bon. ipsi domino Rectori, et Massario seu depositario Universitatis tantundem, et cuilibet Consciliario sue nationis viginti solidorum bon. pro quolibet. Item ad obviandum malitijs, que possent accidere in futurum in testamentis talium infirmorum, statuerunt, quod si aliquis voluerit facere testamentum, aut ultimam voluntatem, ipsam teneatur fierj facere et scribi per notarium Universitatis, vel eius substitutum. Et si eius copia haberi non posset, aut substituti ipsius, et fieret per alium, quod fiat in presentia domini Rectoris, qui pro tempore fuerit, aut depositarij [291] Universitatis et alterjus bidellorum generalium dicte Universitatis, quod si secus fieret, ex nunc statuerunt tale testamentum, seu ultimam voluntatem, nullum fore nichil valere. Statuentes insuper, quod si contingeret, quod deus avertat, Sapientem et Syndicum dicte Universitatis, vel notarium dicte Universitatis aut eius substitutum, aut aliquem de ipsorum vel alterius eorum familijs infirmare, quod quilibet doctor medicine actu legens, qui pro eorum parte fuerit requisitus vel alterius eorum, sub pena periurij, teneatur talem informum seu infirmos saltem bis in die visitare in loco in quo esse[n]t, et ipsum cum omni diligentia curare quousque fuerit liberatus, absque quod aliquod precium vel mercedem aut aliud loco ipsius possit percipere vel habere. Et nichilominus qui predicta facere obmiserit, penam incidat centum solidorum bon. pro vice qualibet, Universitatj applicanda. Et aliquis doctor non possit petere aut exigere ab aliquo supradictorum in presenti statuto comprehensorum pro salario vel mercede, cura vel visitatione talis infirmi, seu infirmorum, aliquod salarium vel aliquid aliud nomine salarij, sub pena centum solidorum bon. et restitutionis eius quod receperit. Quas penas si solvere recusaverit et acceptam restituere, privetur et a privatione restituj non possit, nisi predicta adimpleverit.