Quoniam ad industriam et utilitatem scolarium spectat et pertinet facere anothomiam, et plerumque consuerverunt rixe et rumores in reperiendis seu querendis corporibus, ex quibus seu de quibus anothomia fieri debeat, statuerunt et ordinaverunt quod aliquis doctor aut scolaris aut quivis alius non audeat vel presumat sibi aquirere aliquid corpus mortuum pro dicta anathomia fienda, nisi primo licentia prehabita a domino Rectore, quj pro tempore fuerit. Quj quidem Rector teneatur et debeat, in dando licentiam inter scolares et doctores, qualitatem et ordinem observare cum dicta licentia petita fuerit. Item quod aliquis non possit interesse in aliqua anothomia hominis masculi ultra numerum vigintj, et ad anothomiam mulieris ultra numerum triginta. Et quod aliquis non possit videre aliquam anothomiam, nisi sit scolaris qui audiverit medicinam duobus annis integre, et sit in tertio anno, etiam si tempore interdicto audivisset. Et qui viderit anothomiam hominis semel, in eodem anno non possit plus videre. Quj vero bis viderit, non possit plus videre Bononie, nisi anathomiam mulieris, quam semel et non ultra quis videre possit, sive viderit anothomiam hominis, sive non. Prefati autem viginti seu triginta qui videre et interesse possunt anothomie, assumantur et eligantur infrascripto modo, videlicet: in anothomia virj quinque de natione lombardorum, quatuor de natione tuschorum, quatuor de natione romanorum, tres de natione ultramontanorum, et tres Bononienses. Et in anothomia mulieris debeant eligi octo de natione lombardorum, septem de natione tuschorum, septem de natione romanorum, quinque de natione ultramontanorum et tres bononienses, salvo quod dominus Rector, cum uno socio, possit esse ad [290] quamlibet anothomiam ultra numerum supradictum, absque aliqua solutione, non obstante quod qui viderit anothomiam semel in eodem anno non possit plus videre. Sit autem in arbitrio eius, qui habuit licentiam a domino Rectore, eligere quos voluerit, servata tamen forma huius statutj. Item quod nullus audeat petere anothomiam domino Rectorj tempore sue electionis in sancto Francischo, sub pena quinque librarum bon. Et quod dominus Rector inmediate post acceptationem offitij sui debeat facere publicari per scolas quibus dederit licentiam anothomie, ut omnibus possit esse notum, pena eidem Rectorj non observanti et observare facienti predicta decem librarum bon., et cuilibet scolarj contrafacientj, aut qui contra predicta vel aliquid predictorum venerit, centum solidorum bon. Item quod quilibet doctor, qui a scolaribus fuerit requisitus, teneatur ipsam anothomiam facere modo et forma predictis, non obstante quod ipsam alias fecerit dicto anno, et habeat pro suo salario centum solidos bon. Fiant autem expense predicte et alie, que in predictis occurrerint, seu pro predictis fiende, pro rata comuniter inter scolares qui interesse seu videre debuerint, ita tamen quod pro anothomia fienda de aliquo homine non possint expendi ultra sexdecim libras bon., et pro anothomia mulieris ultra viginti libras bon., pena cuilibet doctori centum solidorum bon. Ita tamen quod dictus talis qui sic juraverit et expensas fecerit, cum uno socio, quem nominaverit, a dictis expensis penitus excludatur. Et quod dominus Rector antequam incipiatur fieri anothomia ad se convocari faciat scolarem, cuj licentiam dederit pro anothomia, et eidem dare sacramentum teneatur, quod expensas faciet bona fide et sine fraude, et quod inter scolares videntes anothomiam comunicabit, sub pena Rectorj, qui pro tempore fuerit, decem librarum bon.