Statuerunt quod dominus Rector et consciliarij precise teneantur et debeant de mense novembris quolibet anno facere precipi per scolas et nuntiarj quod omnes qui intendunt esse in Bononiensi studio pro toto anno vel parte annj in scientia medicine, teneantur dare in scriptis notario Universitatis vel bidellis generalibus eiusdem eorum nomina et cognomina. Qui notarius vel bidellus teneatur dicta nomina in scriptis redigere distincte, ponendo per se divisam quamlibet nationem. Teneatur etiam ipse Notarius matriculam quamlibet intitulare infrascripto modo: In christi nomine amen, anno domini, etc. ponendo millesimum et inditionem que erunt pro eo anno, quo fieri et scribi matricula predicta contingerit. Et postea dicat et scribat: Hec est matricula generalis studij medicorum civitatis Bononie juratorum servare statuta facta et fienda dicte Universitatis et obedire domino Rectori ipsius in licitis et honestis per me Iohannem notarium subscriptum, ac ipsius Universitatis notarium, tempore Rectoratus talis Rectoris, ponendo etiam nomen Rectoris, qui tunc temporis esset; et habeat pro scriptura matricule solidos viginti bon. Quo libro facto, teneatur etiam dominus Rector facere et dici et mandari per scolas [289] quod omnes et singuli novitij et omnes alij quj non jntraverunt Universitatem, nec iuraverunt obedire Rectori presenti, et quj pro tempore fuerit, ac servare statuta Universitatis facta et fienda et ad alia faciendum que tenentur ex forma statutorum Universitatis et quod alij novitij qui post dictam denuntiationem seu proclamationem venerint ad civitatem Bononie pro studendo in dicta scientia medicine, teneantur infra octo dies venire etiam et iurare et ea facere, que continentur supra in statuto posito sub Rubrica: de eo qui venerit noviter ad studendum etc. Voluerunt etiam quod quicumque scolaris dicte Universitatis cognoverit aliquem novitium vel aliquem alium qui non juraverit, ut dictum est, teneatur, sacrament[i] vinculo, ipsum denuntiare Rectori vel notario aut bidellis Universitatis; qui Rector teneatur ipsum compellere ad iuramentum prestandum, ut in statutis plenius continetur. Et siqui iurare contempserint, contra ipsos ipse dominus Rector habeat purum et merum arbitrium, statuto aliquo non obstante, scilicet in penis exasperandis et non modificandis, et in eis imponendis et exigendis. Statuerunt insuper et firmaverunt quod nullus possit vel audeat se facere poni vel conscribj in alia natione quam vere sit. Ita quod si faceret se poni in alia natione quam vere sit, cadat in penam viginti librarum bon., et quilibet possit accusare et denuntiare et habeat tertiam partem conde[m]pnationis. Et Rector teneatur contra predictos inquirere et condempnandos condempnare, sub eadem pena ipsi domino Rectorj. Insuper ad probandum quod aliquis sit scolaris et de Universitate predicta, ac ipsum iuratum, secundum quod tenetur ex forma statutorum dicte Universitatis, suffitiat probarj per matriculam predictam in qua descriptum reperiatur nomen et cognomen eius, vel per scripturam sumendam ex dicta matricula de ipsius nomine et cognomine per notarium Universitatis predicte.