Item cum sepe contingat bidellos et stationarios, mercimonij causa, Bononie libros emere ex quo et venditores in precio viliori vendendo et emptores in cariori emendo decipi [287] possunt, et verisimiliter decipiuntur, nec, ut expedit, se faciliter scolares libris fulcire possunt, et maxime nisi per ipsorum bidellorum vel stationariorum manus, statuerunt quod aliquis dictorum bidellorum seu stationariorum aut quevis alia persona Universitati predicte subiecta non audeat vel presumat per se vel alium directo vel per obliquum, mercimonij causa, libros emere; et siquis contrafecerit penam incidat ipso facto decem solidorum bon. pro qualibet libra precij empti, exigenda per dominum Rectorem, sub pena statutorum. Et quilibet possit accusare et denuntiare tales contrafacientes palam et secrete, et habeat medietatem condempnationis. Teneatur etiam quilibet Rector, ad denuntiationem cuiuscunque, de predictis inquirere et culpabiles punire, ut supra, ac etiam teneatur omni mense eligere duos scolares secrete qui debeant inquirere de predictis et quolibet predictorum. Et si aliquem invenerint contrafacientem, denuntiare, etiam in secreto si voluerint, domino Rectori, qui pro tempore erit, quorum et cuiuslibet eorum denuntiatio, cum sacramento, pro plena probatione habeatur, non excludendo ex predictis quin alius denuntiare possit, et habeat partem suam, ut supra, pena cuilibet Rectori, qui fuerit pro tempore, viginti solidorum pro quolibet et qualibet vice qua negligens fuerit in predictis. Item ad maiorem cautelam predictorum, statuerunt quod dominus Rector presens una cum doctoribus et aliquibus scolaribus infra mensem proxime venturum teneatur ire coram domino civitatis vel Ancianis Communis Bononie, et ab eis petere quod faciant aut fieri faciant provisionem quod nullus possit emere libros medicine et artium, mercimonij causa, sub certa pena per eos indicta, sub pena Rectori, si negligens fuerit in predictis, decem librarum bon.