Cum ad conservationem librorum venalium provisum fuerit quod Universitatis predicte generales bidelli debeant ydonee satisdare de quingentis libris bon. pro quolibet, ad hoc ut unicuique, tam vendenti quam emere volenti de libris, pro precio sit cautum, quod quidem est et fuit eis, qui iam dictam satisdationem fecerunt, gravissimum et honerosum, considerantes statutarij illud quod scribitur, quod qui sentit onus sentire debet et commodum, statuerunt et ordinaverunt et firmaverunt quod omnes et singuli libros venales habentes vel qui in futurum habebunt aliquos libros medicine aut aliquarum liberalium artium quos venales intendant exponere, illos teneantur et debeant venales exponere et designare tantum bidellis predictis, aut alteri eorum pro se et socio recipienti, et nulli alteri bidello sive stationario; et si quos designasset et exposuisset, illos infra tertiam diem repetant et predictis Universitatis bidellis designent quando vendere voluerint, pena cuilibet contrafacientj, et pro qualibet vice, centum solidorum bon. Quorum tertia pars sit accusantis et residuum Rectoris et Universitatis predicte. Et quilibet possit [286] et teneatur contrafacientes accusare et denuntiare palam et secrete domino Rectori, faciendo fidem condecentem, et in credentia, si voluerit, teneatur. Mandantes insuper quod dicti bidelli dictos libros penes eos exponendos et designandos benigne recipiant, et diligenter ipsos salvent et custodiant et petentibus copiam faciant, et circa ipsorum venditionem tam ex parte ementis, quam etiam vendentis, se legalitier et fideliter gerant, et unicuique in gradu suo se gratos, humiles et favorabiles pro viribus exhibentes. Teneantur insuper predicti stationarij in suo libro, ad hoc specialiter deputato, scribere aperte et clare, de bona littera, que aperte legi possit, nomen et prenomen unius cuiusque designantis seu venalem exponentis sibi aliquem librum et conditionem et intersignia et nomen libri et ipsius extimationem, seu precium pro quo vult venditor darj, et diem designationis et quando ipsum librum vendidit, et quantitatem precij pro quo vendidit, et diem quando eidem vendidit, et cuj vendidit, ad hoc ut omnis cesset error tam inter venditores et emptores quam etiam inter ipsos et bidellos predictos. Quj liber semper et perpetuo esse debeat ad stationem et in statione dictorum bidellorum, ita quod, quando esset expediens, de eo semper copia habeatur. Suprascripti autem tenoris cedulam teneatur bidellus, cui designatus fuerit, dare de sua propria manu, si petita fuerit, ei qui ad stationem librum suum posuerit, pena viginti solidorum bon. in quolibet casuum predictorum. Statuerunt insuper quod dicti bidelli seu alter eorum, et quilibet alter stationarius, teneatur ponere nomina librorum et precium super quadam tabula, que publice stet suspensa in statione sua. Et siqui petant ab eis cuius sunt libri, hoc petenti dicere teneantur, sub pena duorum solidorum pro quolibet et qualibet vice. Possint autem et liceat dictis stationarijs, seu bidellis, habere et recipere quatuor denarios parvos pro libra qualibet precij pro quo liber venderetur, tam ab emptore quam a venditore. Verum quia sepe contingit quod, quando bidelli dicunt scolaribus volentibus emere libros cuius sunt dicti libri, dicti scolares in fraudem dictorum stationariorum forum faciunt cum eo, qui librum venalem exposuisset, [et] etiam eum accipi faciunt de statione, statuerunt quod si aliquis scolaris vel quivis alius posuerit aliquem librum in statione causa vendendi, et postea eum reciperet de dicta statione, et contingat infra mensem vendere dictum librum, vel alias quandocumque alicuj persone de qua, [vere vel presumptive Rectoris] arbitrio, possit esse suspitio quod in fraudem dictorum stationariorum seu bidellorum factum fuerit, quod dictus dominus Rector teneatur cogere quemlibet eorum, videlicet venditorem et emptorem, ad satisfaciendum dictis bidellis de dicta venditione, videlicet quatuor denarios pro libra precij empti a quolibet eorum, ac si dictus liber esset venditus per dictos bidellos et in eorum statione, sub pena cuilibet contrafacienti quadraginta solidorum. Et quilibet, sub virtute sacramenti, teneatur tales contrafacientes denuntiare domino Rectori et teneatur in credentia, et habeat tertiam partem condempnationis.