Item statuerunt quod omnes bidelli doctorum, tam ordinarie quam extraordinarie legentium, debeant iurare obedire Rectori et servare statuta que eos tangunt, et venire ad convocationem et congregationes ipsorum vel alterius eorum et ad exequias secundum formam statutorum dicte Universitatis. Teneantur insuper satisdare quolibet anno, infra quindecim dies post principium studij, coram Rectore, qui pro tempore fuerit, notario Universitatis, et ipsi Rectori, stipulantj et recipienti nomine et vice dicte Universitatis et nomine et vice omnium et singulorum, quorum interest vel interesse poterit, de centum libris bon. de libris scolarium suas scolas intrantium, apportatis in scolis et dimissis, de quibus per duos vel tres testes Rectori fides fieret diligenter, custodiendis et salvandis et eis quorum fuerint, restituendis ipsis, vel extimationem ipsorum, de qua extimatione credatur sacramento cuius liber esset, cum sacramento illi prestito et a duobus alijs quod [283] credebant librum valere tantum. Et siquis bidellorum dictam satisdationem recusaverit facere vel prestare, ab offitio repellatur. Addijcientes etiam quod nullus bidellorum generalium bidelli spetialis offitium modo aliquo assumere valeat nec audeat, vel se aliquo modo immiscere, pena eidem bidello centum solidorum bon. et tantundem doctori, exigenda per Rectorem, qui pro tempore fuerit, infra octo dies postquam ad ipsius notitiam pervenerit, sub eadem pena.