Item statuerunt quod si aliquis scolaris de Universitate predicta, aut quivis alius dicte Universitati suppositus, qui iuraverit obedire domino Rectori presentj aut qui pro tempore fuerit et servare statuta Universitatis predicte facta et fienda, conduxerit aut conductam habuerit aliquam domum vel aliquod hospitium pro aliqua pensione aut mercede, quod eidem conductorj seu conductam habenti, liceat iure inquilinatus, quod ius pro [278] dicta conductione conducenti competere statuerunt, etiam pro sequenti anno ipsam domum seu hospitium pro eadem pensione retinere, et sic successive usque ad triennium a tempore conductionis. Et si plures socij simul et semel conducentes non possint, quotcumque fuerint, dictum benefitium habere, nisi usque ad triennium inter omnes, computatum a tempore conductionis. Nec possit pro maiori pensione ipsam domum seu hospitium retinere, aut de novo reconducere ipsam aut aliam de novo conducendam aut conducendum, nisi aliquod melioramentum factum esset in domo seu hospitio, propter quod plus solito valeret, pena cuilibet conductori per se vel alium contrafacienti centum solidorum bon. pro vice qualibet qua contrafecerit. Teneatur tamen quilibet retinere volens et benefitio inquilinatus et huius statuti uti, ut supra, anno quolibet dum pro sequenti voluerit retinere, ante festum beate Marie mensis septembris ad stationem generalium bidellorum ponere quandam cedulam, in qua contineatur nomen et pronomen ipsius ac domus et confinia quam retinere intendit, et cuius est, ac solitam pensionem; alias benefitio huius statuti, quantum ad dictam domum seu hospitium ratione dicte conductionis, penitus sit privatus. Bidelli autem predicti et ipsorum quilibet teneantur sub virtute prestiti iuramenti talem cedulam recipere, et super ea scribere diem porrectionis ipsius, et per quem porrigitur, et ipsum in una filza ponere cum alijs et in statione tenere et custodire, ita quod viderj possint dicte cedule a quibuscumque. Et si retinere volens domum seu hospitium, ut supra, in retentione impediretur seu molestaretur, ita quod dicto benefitio retentionis uti non possit, domus talis seu hospitium usque ad triennium privetur et interdicatur; de quibus, privatione et interdicto, non restituantur, nisi primo solute fuerint depositario Universitatis predicte, pene nomine, decem libre bon. Si tamen postea ipsam domum seu hospitium pro dicto tempore seu aliqua parte ipsius locaret, seu locasse reperiretur, sine licentia dicti primi conductoris, domus predicta seu hospitium interdicatur seu privetur, ut supra, nec restituj possit, nisi primo solutis ut supra decem libris bon. Et eundem benefitium habere voluerunt omnes et singulos doctores scientie medicine seu artium et Sapientem et Syndicum ac Notarium et bidellos dicte Universitatis. Liceat etiam cuilibet conductori iura predicta inquilinatus et retentionis sibi competentia et pro dicto tempore cedere cuilibet, dum tamen de Universitate et subiecto Universitati, qui iuraverit obedire in licitis et honestis et servare statuta Universitatis facta et fienda. Qui in iure sibi concesso eodem |modo| quo cedens fruatur benefitio, dum tamen suo consocio in domo seu hospitio predicto commoranti illud cedere possit et teneatur si voluerit ipse consocius sibi cedj et eo casu, non alterj. Statuentes insuper quod aliquis scolaris de Universitate aut dicte Universitati suppositus non possit nec audeat, sub virtute prestiti iuramentj et sub pena centum solidorum bon., ante festum sancte Marie mensis septembris conducere aliquam domum, quam habitaret aliquis scolaris de dicta Universitate aut alius dicte Universitati suppositus. Et quod aliquis inhabitans, ut supra, ante dictum festum hospiti respondere non teneatur si intendit aut vult ipsam retinere vel non. Festo autem predicto elapso, teneatur quilibet inquilinus, qui cedulam non dedisset, ut supra, sub virtute sacramenti, domum seu hospitium patienter ad petitionem hospitis cuicunque et quandocumque ostendere seu ostendi facere, pena cuilibet contrafacientj et pro qualibet vice quadraginta solidorum bon. Scolares autem domos conducere volentes, non audeant nec presumant per se vel alium aliquam domum seu ospitium conducere seu conduci facere pro maiori pensione, quam pro ea vel eo solita sit solvj, nisi aliquod melioramentum factum esset, propter quod rationabiliter [279] plus locari deberet, pena cuilibet contrafacienti centum solidorum bon. Declarantes quod aliquis de Universitate predicta seu ipsi Universitati suppositus non audeat vel presumat conducere seu conductam tenere aliquam domum seu aliquod hospitium privatum vel interdictum, sub pena periurij et privationis, a qua privatione restituj non possit nisi primo soluti depositario Universitatis predicte centum solidis bon.