Statuimus quod omnes et singuli scolares novitij qui venient ad studium in medicina vel artibus, rethorica vel notaria ad civitatem Bononie teneantur, sub pena privationis, infra octo dies postquam inceperint scolas intrare, presentare se coram domino Rectore et coram eo iurare obedire eidem et observare statuta Universitatis facta et fienda, et solvant immediate Universitatj predicte quindecim solidos bon. et aliter non admitta[n]tur. Et quod aliquis eum vel eos non recipiat seu retineat in scolarem vel socium, sub pena privationis; que quantitas remitti non possit alicuj aliqua ratione. Spectet autem [273] dicta pecunia tota et integra ad Universitatem sine aliqua diminutione. A qua privatione restituj non possit nisi solutis Universitatj a quolibet privato quindecim solidis bon.