Item statuerunt quod quando aliquis scolaris ire debuerit ad sanctum Petrum pro privata recipienda, non possit ire nisi cum doctore suo et decem socijs, et cum decem socijs redire, quos decem socios debeat dare in scriptis domino Rectorj antequam vadat ad sanctum Petrum pro dicta privata recipienda, sub pena centum solidorum bon. cuilibet examinando, et cuilibet alteri scolarj ultra illos decem, qui cum dicto examinando irent vel redirent, quinque solidorum bon. Item statuerunt quod aliquis scolaris examinandus pro eius examine non teneatur solvere nisi pro quindecim doctoribus, solvendo cuilibet sex solidos bon. Et in publica etiam non teneatur solvere nisi pro decem doctoribus, solvendo cuilibet quatuor solidos bon. Et quod nullus doctor existens in privata vel publica audeat sibi dividere pecuniam doctorum non existentium in privata vel publica, sed dicta pecunia doctorum non existentium in privata vel publica sine causa legitima, arbitrio Rectoris et Vicarij domini Archidiaconj computanda, restituatur scolarj examinato vel publicato, ut moris est, sub pena decem solidorum bon. cuilibet doctorj contra facientj. Adicientes quod si predictus scolaris velit ire ad dictam privatam recipiendam ultra dictum numerum decem sociorum, possit ire sine aliqua pena.