[270] Item providerunt quod Rector quilibet in principio suj regiminis seu offitij teneatur et debeat infra quindecim dies, in virtute prestitj iuramentj et sub pena centum solidorum bon. pro qualibet vice, eligere de quibuslibet scolis Medicine et artium quatuor scolares ydoneos, scilicet de unaquaque nactione; quj eligendi, sub pena centum solidorum bon. pro quolibet, quam ipso facto incurrant, teneantur iurare infra tres dies post eorum electionem et postquam fuerint requisitj, denuntiare Rectori seu Sapientj et Syndico Universitatis si contingat suum doctorem aliquam penam incurrere seu non intrare tempore debito, vel non disputando, vel quocunque alio modo; quam penam incurreret ex forma aliquorum statutorum Universitatis. Et dominus Rector teneatur procedere ad denuntiationem predictorum et cuiuslibet eorum, et in secreto tenendi si teneri voluerit, et debitas penas exigere ac procedere contra ipsos doctores, sub pena Rectori centum solidorum bon. in quolibet capitulo et tantundem cuilibet dictorum scolarium sic electorum non observantj predicta. Teneantur autem denuntiatores in credentia per dominum Rectorem, sub pena Rectori propalantj denuntiatores predictos trium librarum bon.