Item statuerunt quod scolaris quilibet et quicumque alius Universitati predicte subiectus teneatur jurare obedire Rectori, qui pro tempore fuerit, in licitis et honestis, et quod adversus presentia statuta aut aliqua in eis contenta, non faciet seu veniet quoquo modo. Et si ipsum eligi contingerit ad aliquod offitium dicte Universitatis ipsum nullatenus recusabit, et quod se nullatenus absentabit ne eligatur; et non procurabit per se vel alium directo vel per obliquum, nec pro se vel alio, ne eligatur vel non eligatur ad aliquod offitium, nec preces porriget pro se vel alio, aut supplicabit per se vel alium ut predicta vel aliquod predictorum fiant vel non fiant, vel quod impediatur vel differatur aliqua pene exactio, que secundum statutorum formam fieri posset vel deberet. Et quod veniet ad omnes et singulas convocationes et congregationes fiendas per Rectorem [267] seu de eius mandato iuxta suam possibilitatem, et stabit ibidem donec Rector et alij erunt de propositione expeditj. Et si in dubium in aliquo casu revocaretur, utrum licitum et honestum esset quod preciperetur per dominum Rectorem, debeat viderj cognosci ac declararj per consciliarios; quorum declarationi stetur etiam facto partito inter eos cum fabis albis et nigris per ipsorum Congregatorem si opus fuerit, pro quibus ipse Congregator dictos Consciliarios facere congregari teneatur ad requisitionem tam Rectoris quam scolaris, qui obedire recusaret. Et licet presentia statuta fuerint multociens lecta et publicata etsi ignorantia seu oblivio per alterum eorum allegaretur, quod eius iuramento se valeat excusare, jn hoc tamen omnis cesset obiectio. Et quod dominus Rector alicuj non possit remittere seu differre sacramentum predictum ultra quindecim dies a die perhemptorie citationis seu proclamationis fiende per scolas nactionis de qua scolaris fuerit, quam fieri facere teneatur quilibet Rector, more solito, in virtute prestitj iuramenti et pena centum solidorum bon. [et] cuilibet non jurantj, ut supra, decem solidorum bon. pro qualibet vice; quam si non solverit infra octo dies, elapso tempore sacramentj prestandi, per scolas publice privatus Universitatis commodo nuntietur; a qua privatione restituj non possit nisi dicta pena primo soluta et sacramento prestito ut supra.