[265] Item cum utile et necessarium sit scolaribus pro ordinatione questionum disputa[n]darum per magistros seu lectores fratrum cuiuscunque ordinis et ut de questionibus per eos disputatis habeatur copia, statuerunt quod quilibet dictorum magistrorum, sive lector, debeat duas questiones disputare quolibet anno ante Pascha Resurrectionis, et etiam debeat disputare de quolibet; et dictas questiones determinare, et determinatas ad stationem generalium bidellorum ponere in bonis cartis et de bona littera, que continue stent ad statione ut de ipsis semper copia habeatur; et quod junior magister, sive lector, primo debeat disputare et sic successive, et quj primo disputaverit de mane, teneatur in die qua alter disputat questionem per eum disputatam determinare, et hoc hora none. Et quod in dictis disputationibus debeant interesse bachalarij sive magistri studentium cuiuscumque ordinis cum sufficienti comitiva fratrum. Item quod quilibet doctor actu legens in civitate Bononie, si fuerit conventuatus in phylosophia, teneatur interesse dictis disputationibus, et etiam quilibet, doctor sive non doctor, legens in civitate Bononie phylosophyam ac etiam quilibet tenens cathedram in disputando in phylosophya, et ibi stare a principio usque ad finem, nisi iusta causa subesset, que sacramento valletur. Pena cuilibet doctori sive non doctori legenti et cuicumque tenenti cathedram in disputando decem solidorum bon. pro qualibet vice. Item quod in dictis disputationibus scolares et doctores esse et stare debeant quiete et pacifice, et non allegare vel opponere pro parte opponentis vel respondentis, nec etiam contra, sub pena quinque solidorum pro quolibet et qualibet vice. Item quod quilibet Rector teneatur interesse dictis disputationibus a principio usque ad finem, vel alius loco suj, sub pena viginti solidorum bon. pro qualibet vice. Item quod in dictis disputationibus primo arguant quatuor fratres et quatuor scolares, ita quod primo arguat unus frater, et postea unus scolaris, et sic successive. Et quod illi et quilibet eorum non possint facere nisi unum argumentum, et dictum argumentum uno alio confirmare. Et quod illi octo qui arguunt ad unam, in proxima sequenti questione arguere non possint si fuerint alij volentes arguere, et postea arguant bachalarij; demum quilibet doctor teneatur arguere si voluerit. Item quod in quibuscumque scolis relinquantur certe banche prime pro doctoribus et bachalarijs, pena cuilibet, qui se posuerit in dictis bancis, duorum solidorum si immediate dictas banchas non evacuaverit. Item quod magistri et bachalarij, cuiuscumque ordinis, cum suffitienti comitiva fratrum teneantur venire ad publicas fiendas tam in medicina quam in artibus. Pene autem imponende dictis magistris sive lectoribus vel bachalarijs sive fratribus, cuiuscumque ordinis, apponantur per eorum principales et maiores, de quo appareat publicum instrumentum cum sigillo cuiuscumque ordinis de omnibus et singulis suprascriptis capitulis et quolibet predictorum observandis, adeo quod Universitas habeat a quolibet predictorum ordinum unum tale instrumentum cum sigillo ordinis, et quilibet ordo habeat unum instrumentum ab Universitate nostra cum sigillo Universitatis. Quod si facere noluerint et contempnerent, ex nunc istud statutum sit nullum et nullus ad eorum disputationes ire teneatur. Et quod predictis fratribus dentur quatuor dies, ante principium studij Medicine et artium pro eorum principijs, et octo dies pro eorum disputationibus questionum generalium, et quatuor dies pro eorum disputationibus de quolibet; et [266] quatuor dies de illis octo qui dantur pro questionibus generalibus dentur eis in primis quatuor ebdomadis quadragesime, dummodo non sint dies sollempnes in quibus dicti fratres nolent disputare. Quj autem sint dies eis dandi hoc remaneat in discretione Rectoris, qui pro tempore fuerit. Et quod nullus in illis diebus audeat disputare vel legere horis in quibus dicti fratres disputarent vel determinarent, aut eorum principium facerent, aut audeat cum dictis magistris sive lectoribus concurrere, sub pena viginti solidorum bon. pro quolibet et qualibet vice. Et quod omnia et singula supradicta debeant per quoscumque tam Rectores quam doctores et scolares perpetuo et jnviolabiliter observarj, si predicti fratres ea que in dicto statuto continentur observare et executionj mandare voluerint, et aliter non.