Item statuerunt, ordinaverunt et firmaverunt quod doctor electus vel eligendus per dictam Universitatem ad salarium ad legendum in astrologia, teneatur iudicia dare gratis scolaribus dicte Universitatis infra unum mensem postquam fuerint postulata, et etiam singulariter iudicium annj in scriptis ponere ad stationem generalium Bidellorum, et etiam teneatur legere secundum puncta, ea servando solum diebus festivis et vacationum, pena pro qualibet vice in quolibet dictorum casuum, viginti solidorum bon. Item quod doctor electus ad salarium astrologie teneatur et debeat quolibet anno disputare duas questiones in astrologia et eas determinare infra octo dies a die dicte disputationis et etiam teneatur disputare de quolibet in astrologia semel adminus, et dictum quodlibet determinare, ut supra, et dictas questiones et dictum quodlibet in scriptis ad stationem ponere et dare de bona littera et in bonis cartis membranis, non abrasis ad formam modi maioris infra quindecim dies post determinationem. Et dicte questiones continue stent in statione, ut de eis copia habeatur.