Item providerunt et ordinaverunt quod quilibet doctor legens in artibus teneatur et debeat quolibet anno disputare duas questiones, et eas sic disputatas ad stationem ponere de bona littera et in bonis cartis membranis non abrasis ad formam que vocatur modus maior, et quamlibet per se in uno folio si cadere poterit, alias in uno quaterno, ita tamen quod quilibet legens loycham disputet duas questiones in loycha, et etiam de quolibet in loycha cum sibi disputare contingerit [u]t infra. Et quilibet legens gramaticam disputet duas questiones in gramatica, et etiam de quolibet cum ipsum contingerit, ut infra. Et quilibet legens phylosophyam disputet duas questiones in phylosophya, et etiam de quolibet cum ipsum contingerit, ut infra. Et nullus possit respondere ad aliquam questionem generalem in artibus, nisi audiverit duobus annis, vel decem octo mensibus ad minus, in illa scientia in qua respondet. Item quod nullus doctor, occasione alicuius questionis date vel dande alicui scolari, audeat recipere ab aliquo scolari aliquam quantitatem pecunie; vel aliquod aliud directe vel indirecte, sub pena quadraginta solidorum bon. pro qualibet vice, et quilibet possit accusare palam et secrete et habeat tertiam partem condempnationis. Ita tamen quod junior doctor incipiat disputare in alijs questionibus, quam de quolibet, et sic successive procedatur usque ad antiquiorem. Hoc addito, quod solum unum quodlibet in anno in qualibet dictarum scientiarum fieri possit, ordine tamen inter doctores attento in unaquaque dictarum scientiarum, ut primo antiquior incipiat et postea successive alij subsequantur, ut supra in statuto de quolibet in medicina fiendo est statutum, et ad penam in dicto statuto appositam, et dictum quodlibet fiat seu in medicina in die sequenti quodlibet fiendum in medicina ante nativitatem. Et quolibet loyce post nativitatem in die sequenti quodlibet medicine, et quodlibet grammatice fiat in die sancti Thome Chanturiensis. Et quod Rector, vel ei substitutus [264] semper debeat interesse ad unumquodque dictorum quodlibet, pena viginti solidorum pro vice qualibet. Debeant etiam interesse omnes et singuli doctores illius scientie in qua fieret dictum quodlibet, pena viginti solidorum bon. pro quolibet, nisi iusta causa excusaretur. Et omnes questiones sic deposite et consignate, perpetuo stare et remanere debeant in dicta statione, ut semper de eis copia habeatur; nec eas dictis doctoribus restituere teneantur aut possint, nisi ydoneum pignus darent de restituendo eas. Et idem servetur de omnibus alijs eorum questionibus de quolibet. Quod quolibet teneantur dare ad stationem infra quindecim dies a die determinationis, et infra octo dies debeant determinare a die disputationis, et teneantur dare pignora et alia facere prout alij doctores legentes in medicina ordinarie faciunt. Et quod omnes doctores legentes in artibus teneantur ire ad disputationes et stare a principio usque ad finem, et arguere quilibet eorum et stare in dictis disputationibus pacifice et quiete. Nec debeant allegare pro parte opponentis vel respondentis nec contra, sub pena viginti solidorum pro quolibet et qualibet vice. Et dominus Rector teneatur de predictis inquirere et delinquentes condempnare, sub pena centum solidorum bon. ipsi domino Rectorj.