Item cum Universitas predicta multa substineat gravamina occasione electionum fiendarum de doctoribus eligendis ad salaria Communis Bononie, et ut dicta Universitas facilius expensas possit supportare ac substinere, statuerunt quod quilibet doctor de cetero eligendus ad salarium Communis Bononie per ipsam Universitatem, vel aliter ad scolarium utilitatem, teneatur solvere unum grossum, pro qualibet libra recipienda a Communi Bononie, Massario dicte Universitatis qui pro tempore ydoneus foret, recipienti nomine Universitatis, et pro ipsa Universitate convertendas in necessarijs expensis Universitatis predicte; ut si erit electus ad salarium in pratica, antequam admittatur ad dictam electionem acceptandam, solvat quinque libras bon., et tantumdem quilibet electus ad salarium in phylosophia. Si vero eligeretur in astrologia, [in loicha] et rethorica, solidos quinquaginta bon. |pro quolibet|; et si aliquis electus neglexerit predicta, non admittatur ad acceptandum dictam electionem, et notarius Universitatis aliquam scripturam celebratam in publicam non audeat redigere formam, et in eum casum electio de eo facta, sit nulla ipso iure, et incontinenti jnfra octo dies ad electionem alterius procedatur, sub pena decem librarum bon. Rectori qui pro tempore fuerit.