Item cum turpe et non consonum sit quod doctores grammatice sint in Collegio medicorum et veniant ad examinandum promovendos in medicina, statuerunt quod dominus Rector una cum sapiente et syndico Universitatis et Consciliarijs et doctoribus legentibus debeant ire ad dominum Civitatis vel ad illum ad quem spectat hoc offitium, et supplicare quod fiat spetialis proviso quod nullus non doctoratus in medicina possit interesse examinj alicujus promovendi in medicina, nec dare voces alicuj scrutinio alicuius promovendi in medicina. Et etiam quod nullus non conventuatus in scientia in qua aliquis vult promoverj, possit esse de Collegio doctorum examinantium in illa scientia, cum nullus possit esse verus iudex eorum que non [no]vit, sub pena centum solidorum bon. domino Rectori, si non jverit jnfra mensem post publicationem statutorum ad predicta procurandum. Quod si secus fuerit, ex nunc statuerunt quod nullus scolaris promovendus audeat solvere alicuj magistro aliquam quantitatem pecunie pro examjne publico vel privato, qui sit de aliquo collegio, contra formam predictam sub dicta pena.