Item statuerunt quod quilibet promovendus tam in medicina quam aliqua liberalium artium iuret domino Rectori nunquam contra Universitatem predictam verbo vel facto patrocinium, auxilium vel consilium prestaturum. Et, si contingat eum remanere Bononie, quod obediet domino Rectorj predicto, et qui pro tempore fuerit, in licitis et honestis, et servabit statuta dicte Universitatis facta et fienda et per ipsam universitatem facta et approbata. Item ad maiorem [cautelam] providerunt quod notarius Universitatis, vel eius substitutus, teneatur et debeat interesse cuicumque publice ubicunque facta fuerit Bononie, et scribere juramentum quod fiet per promovendum seu publicandum. Et de dicto juramento facere publicum instrumentum et ipsum registrare in libro actorum ipsius notarij.