Item statuerunt et firmaverunt quod omnes et singuli doctores medicine, phylosophye, loyce, gramatice seu aliarum artium, legentes aut legere intendentes de mane aut in nonis vel alia quacunque hora, teneantur et debeant jurare domino Rectorj, qui pro tempore fuerit, servare omnia et singula presentia statuta et alia fienda per Universitatem, et obedire Rectori in licitis et honestis; quod sacramentum teneatur quilibet Rector procurare prestari debere et quod prestetur effectualiter per doctores predictos jnfra octo dies ab introitu suj offitij, sub pena centum solidorum bon. et tantundem doctori non juranti; quam penam solvere teneatur doctor quilibet, qui eam inciderit, infra octo dies postquam eam inciderit. Et si non solverit ad dictum terminum, privetur immediate, et ipso |iure| intelligatur privatus; a qua privatione non possit restituj, nisi solverit dictam penam, nec possit eligi ad aliquod salarium Communis Bononie per ipsam Universitatem et scolares usque ad duos annos tunc proxime secuturos. Et si eligeretur, ipso iure electio sit nulla.