[251] Item statuerunt quod quilibet doctor loyce teneatur habere et tenere continue unum Repetitorem generalem, qui saltem audiverit loycam tribus annis ad minus, qui horis debitis repetat omnes et singulas lectiones doctoris eiusdem; et hoc si repetitorem gratis habere poterit, alias ad hoc non teneatur. Et de predictis credatur proprio sacramento ipsius doctoris prestando domino Rectori Universitatis. Repetitor autem predictus nichil recipiat ab aliquo scolarj pro repetitione generali. Item quod quilibet Magister loyce teneatur examinare de sero omnes lectiones et disputare super unaquaque lectione; nec possit repellere aliquem scolarem de scolis vel alio loco in quo esset pro predictis ipse magister, qui voluerit venire et stare ad dictam examinationem cuiuscumque facultatis existat, nisi finita examinatione predicta, sub pena quadraginta solidorum bon. pro quolibet et qualibet vice. Item quod quilibet magister legens in loyca teneatur legere primo in tractatibus primum tractatum modalium, secundo secundum predicabilium, tertio predicamentorum, quarto silogismorum, quinto tractatum locorum, sexto tractatum suppositionum, septimo tractatum fallaciarum sancti thome. De arte autem veteri primo legat librum porfirij, exceptis comunitatibus, postea librum predicamentorum, postea librum periermineas totum; de libro posteriorum primo legat librum primum, excepto capitulo de ignorantia, et legat totum secundum eiusdem. De libro topycorum legat primum, secundum, quartum et sextum; de libro Elencorum legat primo a principio librj usque ad partem illam in qua o[ste]ndit quomodo decipiamur per unamquamque fallaciam tam in dictione quam extra dictionem, et incipit, ibi: fallacia autem in his quidem qui secundum equivocationem. Quo lecto, legatur illud capitulum primi, et silogismus litigiosus, ubi determinat de silogismis litigiosis et temptativis usque ad partem illam: Falsum autem in aliquo, ubi determinat de cautelis, et illud totum dimittatur usque ad finem primj. Postea legat secundum a principio usque ad illam partem in qua determinat de solutione apparenti, et incipit: Primum igitur scienti sylogicare dicimus, tunc dimittatur illud capitulum de solutione apparentj et incipiatur illud capitulum de solutione recta: Quoniam autem recta solutio, usque ad finem secundi. De libro priorum legat primum priorum hoc medio, scilicet a principio primj priorum usque ad partem illam Quaniam igitur qui in hjs figuris, legendo unam lectionem; deinde procedatur ad illud capitulum: Quomodo autem ydonei erimus, et de illo legatur usque ad partem illam: Maior est, quoniam alie considerationes eorum qui sunt secundum electiones. Deinde procedat ad illud capitulum: Quo modo autem reducemus, et legat unam lectionem. Deinde procedat ad ultimum capitulum primj, quod incipit: differunt in construendo, usque ad finem primj et principium secundi. De secundo libro legat unam lectionem de uno quoque capitulo septem specierum. Similiter ex ypotesi, postea incipiat ibi: In principio autem petere, et legat tres lectiones de tribus peccatis contingentibus, circa species silogismorum unam lectionem de uno capitulo: In principio autem secundo de illo, non propter hoc autem. Tertio accidit autem: quandoque in positione terminorum. Postea incipiat ibi: quam non solum dialectici, ubi docet reducere entimema, et exemplum: ad sancti, licet usque ad finem secundi. Item statuerunt quod debeant fieri puncta, videlicet quod fiant [252] novem puncta in tractatibus, pro prima lectione, novem puncta in arte veteri et in libro topicorum et elenchorum pro secunda lectione. Item novem puncta in libro posteriorum et priorum pro tertia lectione. Et quod illa puncta fiant per alterum magistrorum legentium in loyca. Et quod doctores legentes in loyca tenentur servare illa puncta, non preveniendo vel pretermittendo in aliquo puncto, pena pro quolibet puncto non observato, tam in prima quam in secunda et tertia lectione, viginti solidorum bon. Et quilibet possit accusare et denuntiare, et habeat tertiam partem condempnationis, et in credentia teneatur. Item statuerunt quod si esset aliquis doctor vel repetitor, qui vellet legere extraordinarie illos libros loyce tam in prima parte tractatuum quam arte veteri et topicorum et elenchorum, et priorum et posteriorum, qui non leguntur ordinarie, pro tota illa lectura, si fuerit doctor, possit recipere et habere a quolibet scolari, quj eum audiverit, solidos quindecim. Si vero fuerit repetitor solidos decem vel minus, secundum quod convenerit vel pactum fecerit cum scolaribus, vel secundum qualitatem et quantitatem lecture dictorum librorum. Et hoc locum habeat cum lector predixerit aut predici fecerit in scolis publice in principio sue lecture quod intendit quod sibi solvatur ab auditoribus suis; quod si non fecerit, nullus teneatur ad solutionem alicuius quantitatis pecunie pro dicta lectura predicto lectori.