Item statuerunt et firmaverunt quod omnes et singuli doctores medicine, philosophye, loyce, grammatice, seu aliarum artium legentes seu legere intendentes de mane aut in nonis, vel alia quacumque hora, teneantur et debeant iurare domino Rectori, qui pro tempore fuerit, servare omnia et singula presentia statuta et alia fienda per Universitatem, et obedire Rectori in licitis et honestis; quod sacramentum teneatur quilibet Rector procurare prestari debere, et quod effectualiter prestetur per dictos doctores infra quinque dies ab introitu sui offitij sub pena decem librarum bon. ipsi domino Rectori, et tantundem doctori non juranti. Quam penam solvere teneatur quilibet doctor, siquis eam inciderit, infra decem dies postquam eam inciderit. Et si non solverit infra dictum terminum, privetur immediate, et ipso jure intelligatur privatus, a qua privatione non posit restituj nisi solverit dictam penam. Nec possit ad aliquod salarium Communis Bononie per ipsam Universitatem et scolares usque ad duos annos tunc proxime secuturos eligi; et si eligeretur, ipso iure electio sit nulla.